«Салават күпере»ндә ике яңа күп фатирлы йорт салынды
Фатир ачкычларын социаль ипотека республика программасында катнашучылар, Бөек Ватан сугышы ветераннары, күп балалы гаиләләр, ятим балалар, шулай ук грант алучылар алды. Тантаналы чарада ТР Төзелеш, архитектура һәм торак-коммуналь хуҗалык министры урынбасары Илшат Гимаев, ТР Мәгариф һәм фән министры урынбасары Станислав Андреев, ТР Президенты каршындагы Дәүләт торак фондының башкарма директоры урынбасары Владимир Никифоров һәм башка рәсми затлар катнашты. Илшат Гыймаев җыелучыларны сәламләде һәм бүгенге торак тапшыру – 2018 елдагы соңгы түгеллеген билгеләп үтте. Ел ахырына кадәр яңа яшәүчеләр торак комплексның 8 нче кварталындагы тагын сигез йортка 2 мең 584 фатирга күченергә тиеш. Төзелеш эскизы буенча, «Салават күпере» төзелешенең өч чираты барышында 25,4 мең фатирлык 94 йорт төзеләчәк. Шул ук вакытта беренче чиратта 19 йорт инде файдалануга тапшырылган. "Бүген без барыбыз да көткән шатлыклы вакыйга булды. Бүген без чикне узабыз һәм "Салават күпере" икенче чиратын файдалануга тапшырабыз. Тагын сигез йортны карарга, аларны декабрь ахырына кадәр тапшырырга планлаштырабыз. Боларның барысы да ТР Президенты Рөстәм Миңнехановның шәхси контроле аркасында мөмкин булды», – дип билгеләп үтте Гыймаев һәм җыелган халыкка яңа торакка бәхетле тормыш теләде. Киләсе елда Татарстан Республикасы Президенты каршындагы Дәүләт торак фонды 3,5 мең фатирга исәпләнгән «Салават Күпере» комплексының икенче һәм өченче кварталларын төзи башлаячак. Шул ук вакытта агымдагы ел башыннан ДТФ торак программалары буенча Татарстанда 2,9 мең фатирга исәпләнгән 109 йорт файдалануга тапшырылган.