2021 елда Түбән Әлки авылында республика программасын тормышка ашыру нәтиҗәсендә 200 урынга исәпләнгән заманча мәдәният йорты бинасы төзелеше көтелә. Бу хакта район башкарма комитетының мәдәният бүлеге җитәкчесе Рәсимә Гайфуллина хәбәр итте. Түбән Әлки мәдәният учагы бинасы 1986 елда төзелгән, капиталь ремонт 2002 елда үткәрелгән.
"Соңгы елларда районда мәдәният учреждениеләре төзү һәм ремонтлау буенча бик күп эшләнә. 2012 елдан бирле авылларда 10 клуб сафка басты, 5 мәдәният йорты капиталь төзекләндерелде.Быел Ташбилге авылында клубны ремонтлау буенча зур эш алып барыла. Түбән Әлкидә яңа мәдәният йортын төзү планына кертү турындагы хәбәрне халык шатланып каршы алды", - дип хәбәр итә Рәсимә Гайфуллина.