Татарстанда авыл хуҗалыгы җитештерүе объектларын капиталь ремонтлау һәм төзү программаларын гамәлгә ашыру дәвам итә
2020 елда республика авылларында йөзләгән авыл хуҗалыгы җитештерүе объектлары яңартылачак. Шулай итеп, дәүләт программалары кысаларында 158 сыер абзары, 127 ындыр табагы хуҗалыгы, 11 ат фермасы, 12 кош фермасы, 66 машина-трактор паркы, 12 яшелчә саклагычы ремонтланачак, 90 силос-сенаж траншеясы, 7 сыер абзары һәм сарыкчылык фермалары төзеләчәк. Исегезгә төшерәбез, агрокомплекс объектларын яңарту Татарстан Президенты Рөстәм Миңнеханов ярдәме белән мөмкин булды.
2014 елдан башлап сыер абзарларын капиталь ремонтлау һәм 100-200 башка исәпләнгән сөт-товар фермаларын җиһазлар, яңа технологияләр һәм терлекләрне азык белән нәтиҗәле тәэмин итү максатларында силос-сенаж траншеялары төзү программасы гамәлгә ашырыла. 2015 елдан яшелчә продукциясен сыйфатлы саклау өчен яшелчә-бәрәңге саклагычларын капиталь ремонтлау программасын гамәлгә ашыру башланды. 2016 елдан машина-трактор паркларын ремонтлау программасы эшли башлады. 2018 елда ындыр табакларын капиталь ремонтлау программасы гамәлгә керде. 6 ел эчендә әлеге программалар кысаларында барлыгы 1558 сыер абзары, 103 яшелчә-бәрәңге саклагычы, 250 машина-трактор паркы, 257 ындыр табагы хуҗалыгы ремонтланды, 744 силос-сенаж траншеясы төзелде. Бу авыл хуҗалыгы формированиеләренең матди-техник базасын җитди ныгытырга мөмкинлек бирде.