Татарстанда илкүләм проект буенча 151 сәламәтлек саклау объектына капиталь ремонт ясалган
Татарстанда Социаль инфраструктура объектларына капиталь ремонт ясау төгәлләнә. Хәзерге вакытта программаларның шактый өлеше үтәлгән, бу хакта Төзелеш, архитектура һәм торак-коммуналь хуҗалык министры Марат Айзатуллин хәбәр итте.
«Дәвамлы актив тормыш» илкүләм проектына һәм ике республика программасына 226 медицина учреждениесе кертелгән. Финанслауның гомуми суммасы 3 млрд 424 млн сумнан артык.
«Озак һәм актив тормыш» илкүләм проектының «Сәламәтлек саклауның беренчел буынын яңарту» федераль программасы буенча Татарстанның 37 муниципаль берәмлегендә 151 сәламәтлек саклау объекты тулысынча ремонтланган. Шул исәптән 117 фельдшер-акушерлык пункты, 20 район үзәк хастаханәсе, 10 район поликлиникасы һәм 4 балалар поликлиникасы.
Бу максатларга 617 млн 774 мең сум бүлеп бирелгән, шул исәптән республика бюджетыннан 129 млн 733 мең сум.
Моннан тыш, «Балаларга сөт тукландыру пунктларын капиталь ремонтлау» республика программасы буенча 27 муниципаль берәмлектә 56 объектта капиталь ремонт тәмамланган. Эшләрне финанслау 116 млн 258 мең сум тәшкил иткән.
Бу өлкәдә эшләр «Стационарларны капиталь ремонтлау» республика программасы буенча дәвам итә, аны гамәлгә ашыруга 2 млрд 693 млн сумнан артык акча бүлеп бирелгән. Аңа 13 муниципаль берәмлектәге 19 объект кергән. 12 стационарда капиталь ремонт тәмамланган, программа буенча үтәлеш 84% ка җиткән. Узган атнада биш объект тапшырылган: Чирмешән, Бөгелмә һәм Сарман районнарында берәр, Казанда – икәү.
Фотода: Казанда ветераннар өчен илкүләм проект буенча ремонтланган госпиталь