Социаль ипотека буенча Яр Чаллыда күпфатирлы йорт төзелде
«Социаль ипотека» программасы буенча Яр Чаллыда КАМАЗның 55 еллыгы урамында урнашкан 179 фатирлы йорт төзелде. Объект проект документациясе таләпләренә туры килү турында бәяләмә алды.
Яңа 19 катлы йортта лифт белән тәэмин ителгән бер подъезд бар. Барлык фатирлар да әзер килеш бирелә. Шулай ук йорт яны территориясе дә төзекләндерелгән: парковка урыннары, балалар мәйданчыгы җиһазландырылган, эскәмияләр һәм урналар куелган.
Элегрәк ТР Төзелеш, архитектура һәм ТКХ министры Марат Айзатуллин хәбәр иткәнчә, социаль ипотека программасы кысаларында еллык йөкләмәләр ноябрь уртасына 93% ка үтәлгән. Планда каралган 35 йортның 20се 150 мең кв. метрдан артык мәйданга ия. Шул исәптән 5 йорт Чаллыда, 9 йорт Казанда, 2шәр йорт Биектау, Бөгелмә һәм Саба районнарында тапшырылган.
ТР ГИСУ фотосы