Татарстан Премьер-министры Илдар Халиков “Винербергер Куркачи” ҖЧҖ нең керамик блоклар җитештерү заводында булды

Бүген Татарстан Республикасы Премьер-министры Илдар Халиков “Винербергер Куркачи” ҖЧҖ нең керамик блоклар җитештерү заводында булды.

2009 елның июнендә эшли башлаган заводка бүген биш ел тула. Коркачыктагы заводның (Биектау муниципаль районы) егәрлеге – елына 150 млн. данә шартлы кирпеч.

Илдар Халиков Wienerberger AG концерны идарәсе рәисе Хаймо Шойха озатуында предприятиенең яңа җитештерү линиясен эшләтеп җибәрү тантанасында катнашты. Аннан соң, кунаклар завод цехларын карадылар.
Илдар Халиков, завод барлыкка килгәндә төзелеш базарында аның продукциясенә ихтыяҗ булуына бәйле шикләнүләр булды, дип искә алды, ләкин бүген бөтен республикада һәм аннан читтә дә “Винербергер Куркачи” җитештергән кирпечләрдән йортлар төзелә. Бу кирпечләр - җылы, уңайлы, төзелеш өчен иң экологик материал, диде ул.

Ул, үз вакытында Татарстанга ышанган һәм республика территориясендә завод төзегән өчен, Wienerberger компаниясенә рәхмәт белдерде. Аерым алып, ТР Хөкүмәте башлыгы “Винербергер Куркачи” хезмәткәрләрен билгеләп үтте.
“Винербергер Куркачи” заводының беренче бишъеллыгы уңышлы тәмамланды, икенче бишъеллыкның тагын да матур булуын телим ”, - диде Илдар Халиков.

Үз чиратында, Wienerberger AG коцерны идарәсе рәисе Хаймо Шойха, Татарстан Республикасы белән кооперация компаниянең киләчәктәге үсешенә яхшы тәэсир итә, дип белдерде. Безнең предприятие Татарстанда уңышлы эшли, без үсешне инвестициялибез, үсәчәкбез һәм яңа эш урыннары булдырырбыз, яшьләргә яңа һөнәри осталыклар алырга ярдәм итәрбез, - диде ул.
Хаймо Шойха шулай ук завод хезмәткәрләренә икенче бишъеллыкның тәмамлануын гына түгел, ә ким дигәндә, киләчәктә заводның 50 еллыгын бәйрәм итүләрен дә теләде.