Татарстан Республикасында 1млн. 125,4 мең кв.метр торак төзеп тапшырылган, бу еллык планның якынча 47% тәшкил итә

Татарстан Республикасында бүгенгә 1млн. 125,4 мең кв. метр торак төзеп тапшырылган, бу еллык планның 47% тәшкил итә һәм узган ел дәрәҗәсенә караганда 101,7%. Бу хакта бүген ТР Хөкүмәте йортында ТР төзелеш,архитектура һәм торак-коммуаль хуҗалыгы министры урынбасары Ф.М.Ханифов хәбәр итте.Киңәшмәне республиканың барлык муниципаль районнары белән видеоконференцэлемтә режимында ТР Премьер-министры Илдар Халиков уздырды.
Социаль ипотека программасы буенча республикада гомуми мәйданы 86,1 мең кв. метр булган 1мең 521 фатирга исәпләнгән 40 йорт тапшырылган. Югары әзерлек дәрәҗәсендә 72 объект; уртача әзерлек дәрәҗәсендә 9 объект; түбән әзерлек дәрәҗәсендә 7 объект санала.
Халыкны тузган тораклардан күчерү программасына килгәндә, ТР Төзелеш, архитектура һәм ТКХ министрлыгы белән республиканың муниципаль берәмлекләре бергә төзелеш барган һәм 2014 елның 3-4 кварталында файдалануга тапшырылачак торакларны ачыклау буенча эш алып барылды.
Илдар Халиковка муниципаль районнарда универсаль спорт мәйданчыклары төзелеше программасын гамәлгә ашыруның барышы турында хәбәр иттеләр. 2013 ел программасы буенча 33 муниципаль районда 97 спорт мәйданчыгында төзелеш-монтаж эшләре төгәлләнгән.
Илдар Халиков муниципаль район башлыкларын спорт мәйданчыклары төзелешендә контрольне көчәйтергә чакырды.
Авыл җирләрендә каты өслекле юллар төзелеше турында ТР транспорт һәм юл хуҗалыгы министры Ленар Сафин хәбәр итте.
Республика кырларындагы хәлләр турында ТР авыл хуҗалыгы һәм азык-төлек министры Марат Әхмәтов сөйләде.