Казанда «Салават Күпере» микрорайонына хезмәт күрсәтү өчен янгын часте ачыла

Казан шәһәренең «Салават Күпере» микрорайоны янында янгын депосы ачылачак. Ул Залесный бистәсендә Казан - Яшел Үзән трассасыннан ерак түгел, балалар тимер юлы вокзалы каршында, Лесопарковая урамы, 19 адресы буенча урнашкан.

Татарстан Баш инвестицион-төзелеш идарәсе директоры урынбасары Илнар Шәрипов әйткәнчә, 4 машинага каралган янгын сүндерү депосын төзү тиз темпларда башкарылган.

«Төзелеш эшләре 2018 елның көзендә башланды һәм кыска вакыт эчендә төзүчеләр тарафыннан янгын сүндерүне оештыру һәм гамәлгә ашыру, шулай ук авария-коткару эшләрен башкару өчен билгеләнгән барлык нормаларга һәм таләпләргә туры килә торган бина торгызылды», — диде ул.

Яңа янгын часте «Салават күпере» һәм Юдино бистәсен контрольдә тотачак.

Янгын сүндерү депосы беренче дәрәҗә утка чыдам бина. Ике катлы бинаның биеклеге - 6,5 метр, гомуми мәйданы 1 486,45 квадрат метр.

Территориягә төп керү юлы Залесный бистәсеннән Юдино бистәсенә кадәр алып бара торган автомобиль юлыннан уза. Янгын депосы территориясендә саклау складлары һәм өйрәнү манарасы урнашкан.