Дамир Шәйдуллин: ТКХ тармагы төптән үзгәреш этабын кичерә
«Россия – Ислам дөньясы: KazanForum» халыкара икътисади форумы кысаларында «Киләчәкне булдыру: торак-коммуналь хуҗалыкның яңа йөзе» сессиясе узды.
Әйдәп баручы халыкара һәм Россия экспертлары тармакны клиентларга юнәлтелгән һәм технологик экосистемага трансформацияләүнең стратегик юллары турында фикер алышты.
Сессиядә Татарстан Республикасы Төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин чыгыш ясады. Үзенең докладында ул торак-коммуналь хуҗалык тармагының төптән үзгәреш этабын кичерүен билгеләп үтте: инфраструктура эшчәнлеген саклап калуга гына юнәлдерелгән модельдән заманча система формалаштыруга күчү гамәлгә ашырыла.
ТР Төзелеш министрлыгы башлыгының беренче урынбасары сүзләренә караганда, Татарстанның торак-коммуналь комплексы тотрыклы үсеш күрсәтә. 2024 ел нәтиҗәләре буенча күрсәтелгән хезмәтләр күләме 63 млрд сумнан артып киткән, узган ел нәтиҗәләре буенча бу күрсәткеч 67 миллиард сумнан артып киткән.
Дамир Шәйдуллин коммуналь инфраструктураның нык тузган булуына игътибар итте – 405тән артык су һәм җылылык белән тәэмин итү челтәрен алыштыру сорала. Әлеге бурычны хәл итү өчен комплекслы программа гамәлгә ашырыла. 2025 елда коммуналь инфраструктураны заманчалаштыру федераль программасы «Яшәү өчен инфраструктура» яңа илкүләм составына керде. Аны финанслау республикада 4,072 млрд сум тәшкил итте. Барлыгы 11 муниципаль берәмлектә 47 объект заманчалаштырылган. 135 км инженерлык челтәре алмаштырылган.
Моннан тыш, коммуналь хуҗалык объектларының торышын исәпкә алып, Татарстан Рәисе Рөстәм Миңнеханов карары белән 2025 елда 8,526 млрд сумлык республика программасы эшләтеп җибәрелде, аңа 121 объект керде. Аның ярдәмендә 284 км инженерлык челтәре алыштырылган.
Министрның беренче урынбасары республикада Торак фондын яңарту мәсьәләсенә дә игътибар итте. 2008 елдан башлап 12 меңнән артык күп фатирлы йорт ремонтланган, ике миллионнан артык кешенең яшәү шартлары яхшыртылган, ә программаларны финанслауның гомуми күләме 18 ел эчендә 107,647 млрд сумга җиткән.
«Агымдагы елда без 706 күпфатирлы йортта яшәүче 145 мең кешенең яшәү шартларын яхшыртырга планлаштырабыз. Финанслауның гомуми күләме 9,065 млрд сум тәшкил итәчәк», – диде Д. Шәйдуллин.
Шулай ук министр башлыгының беренче урынбасары республикада 2020 елда Татарстан Рәисе Рөстәм Миңнеханов инициативасы белән башланган «Безнең ишегалды» уникаль программасын гамәлгә ашыру турында сөйләде. Әлеге программа кысаларында 2025 елда финанслау лимиты 10 млрд сум булган 677 ишегалды төзекләндерелде. Агымдагы елда 561 ишегалды яңартылачак.