Алабуга районының Хлыстово авылында клуб һәм ФАП төзеләчәк

Бу көздә төзүчеләр Алабуга районының Хлыстово авылында 100 урынлы клуб төзелешен төгәлләячәкләр. Шул ук объект янында ФАП бинасы да төзелә. Бүген торак пунктта 700гә якын кеше яши. "Объект бик мөһим һәм кирәкле, чөнки халык арасында яшьләр бик күп", - дип уртаклаша җирле халык. Клуб янында яңа фельдшер-акушерлык пункты да төзелә. Ике объект та бер урамда урнашкан. Медпункт төзелеше августта башланды. Булачак бинага барлык инженерлык коммуникацияләре дә ясалган, объект барлык кирәкле җиһазлар белән комплектланачак: монда карау һәм процедура кабинетлары, шулай ук пациентларны кабул итү кабинеты урнашачак.