Татарстанда кыш башланганчы мобиль котельныйларны сынап карадылар

Бүген «Казэнерго» АҖ җитештерү мәйданчыгында ике күчмә котельный җайланмасын сынап карадылар. Җайланмалар авария хәлләренә оператив җавап бирү, җылыту системасында суны җылыту һәм вентиляция өчен кирәк. Республикада шундый 2 комплекс бар, алар торак йортларны да, социаль объектларны да – балалар бакчаларын, мәктәпләрне, мәдәният һәм спорт учреждениеләрен һәм башкаларны җылыта ала.

«Котельныйларның берсе 3,5 мВт егәрлеккә ия. Ул биш катлы биш подъездлы 8 йортны җылытырга сәләтле. Икенче котельная - 2,5 мВт-шундый 6 йортны тәэмин итәчәк. Алар өзлексез эшлиләр, дизель ягулыгында эшлиләр», - дип сөйләде Татарстан Республикасы Төзелеш, архитектура һәм ТКХ министрының беренче урынбасары Дамир Шәйдуллин.

Котельныйларны Татарстан территориясендә төрле ситуацияләрдә кулланырга мөмкин. Комплексларны монтажлау 2-3 сәгать вакыт ала, дип хәбәр итте «Татлизинг» ДУП генераль директоры урынбасары Илнар Хисамов.

«Алар һава шартларына бәйле түгел. Комплексларны фундаментка да, машина шассисына да урнаштырырга мөмкин. Котельныйлар бертуктаусыз эшли – ягулык булса тәүлек буе һәм артык җылынмыйлар да», - дип билгеләде ул.

Мобиль котельныйлар 2018 елның мартында Казанның Портовая урамындагы котельный җимерелгәннән соң сатып алынган. Ул вакытта 1,5 мең кеше җылысыз калган, ә нәтиҗәләрне бетерүгә якынча бер тәүлек киткән. Казан җайланмалары республика финанславы кысаларында сатып алынган һәм «Татлизинг» ДУП балансында тора.

Шунысын да билгеләп үтәргә кирәк, күчмә котельныйлар – авария-техник запасның иң зур өлеше, ул ел саен «Татлизинг» ДУП балансында формалаша. Аңа шулай ук электр белән тәэмин итү өчен кирәкле дизель электр генераторлары, шулай ук башка җайланмалар – торбалар, йозаклар, насослар керә. Торак-коммуналь хуҗалык объектларында «стандарт булмаган» хәлләр килеп чыкканда, мондый запаслар районнарга тапшырыла.