Татарстанда быел 555 километр инженерлык челтәренә капиталь ремонт ясалачак

Бүген ТР Хөкүмәте Йортында узган традицион киңәшмәдә ТР Төзелеш, архитектура һәм ТКХ министры Марат Айзатуллин республикада инженерлык челтәрләрен модернизацияләү программаларының гамәлгә ашырылуы турында мәгълүмат бирде.

Республиканың биш программасы объектлары буенча дәүләт контрактларын март-апрель айларында төзү планлаштырыла.

Федераль өлеш буенча 2 программаны гамәлгә ашыру планлаштырыла – «Авыл территорияләренең хәзерге йөзе» федераль проекты буенча 329 млн сумлык 4 инженерлык инфраструктурасы объекты гамәлгә ашырылачак. Алар буенча дәүләт контрактлары агымдагы елның март-апрель айларында да планлаштырылган.

Коммуналь инфраструктураны модернизацияләү программасы кысаларында 45 муниципаль берәмлектә инженерлык инфраструктурасы объектларын реконструкцияләү һәм модернизацияләү күздә тотыла.

Гамәлгә ашыруның гомуми суммасы 10,9 млрд сум тәшкил итәчәк, шуларның 1,6 млрд сумы – РФ бюджетыннан, 1,5 млрд сумы – республика бюджетын уртак финанслау акчалары, 7,7 млрд сумы – республика программасына бүлеп бирелгән акчалар.

Исемлеккә 135 коммуналь хуҗалык объекты керә, шулардан: 37 районда 71 су белән тәэмин итү объекты, 13 районда 31 су чыгару объекты һәм 6 муниципалитетта 33 җылылык белән тәэмин итү объекты.

Барлыгы 555 километр инженерлык челтәрен реконструкцияләү һәм капиталь ремонтлау планлаштырыла.

«Бүгенге көндә объектлар буенча федераль финанслау кысаларында гариза җибәрү өчен кирәкле документлар пакеты әзерләнә. Республика программасы буенча объектлар исемлеген раслау өчен норматив хокукый актка тиешле үзгәрешләр кертелә. Алар буенча дәүләт контрактлары агымдагы елның март-апрель айларында да планлаштырылган», – дип билгеләп үтте Марат Айзатуллин.