ЯҢАЛЫКЛАР
Татарстан Республикасы халыкны эш белән тәэмин итү үзәгенең Лаеш районы буенча бүлеге ремонтланды. Эшләр «Кадрлар» илкүләм проекты составына керә торган «Хезмәт базары белән идарә итү» федераль программасын гамәлгә ашыру кысаларында башкарылды.
Узган шимбәдә ТР Хөкүмәте Йортында узган киңәшмәдә республиканың социаль-мәдәни объектларын капиталь ремонтлау программаларын гамәлгә ашыру турында ТР Төзелеш, архитектура һәм торак-коммуналь хуҗалык министры Марат Айзатуллин хәбәр итте. Киңәшмәне барлык муниципаль районнар белән видеоконференцэлемтә режимында Татарстан Рәисе Рөстәм Миңнеханов уздырды.
Агымдагы елда старт алган «Кадрлар» илкүләм проектының «Хезмәт базары белән идарә итү» яңа федераль программасы буенча 49 мәшгульлек үзәген ремонтлау каралган. Эшләр республиканың бер генә муниципаль берәмлеген дә читләтеп үтмәячәк.