Казанлылар тузган тораклардан чыгарыла

Бүген Казан Ратушасында узган Казан шәһәре Думасының чираттан тыш егерме җиденче сессиясендә депутатлар “2008–2015 елларда Казан шәһәрендә яшәргә яраклы түгел дип табылган торак фондыннан кешеләрне күчерә” дип аталган максатчан муниципаль программа кабул итте.

Казан шәһәре Башкарма комитетының Торак сәясәте башлыгы Эмиль Хөснетдинов билгеләп үткәнчә, Казан шәһәрендә 1996–2004 елларда Тузган торакны бетерү программасы уңышлы тормышка ашырылса да, бүгенге көнгә кадәр гражданнарны яшәргә яраклы булмаган тораклардан чыгару проблемасы кала бирә. Эмиль Хөснетдинов белдергәнчә, Казан шәһәре 1000 еллык тарихка ия, шуңа күрә дә тузган торак мәсьәләсе кискен тора.
Тузган торакны бетерү буенча программаны тормышка ашырганнан соң, башкалада 259 тузган йортта яшәүче 2425 гаилә калган. Алар бүгенге көндә 83201,44 квадрат метрны били. Моннан тыш, Казанда гомуми мәйданы 471859,8 квадрат метр булган 792 күпфатирлы йорт та яшәргә яраксыз булып исәпләнә. Бүген кабул ителгән максатчан программа нәкъ менә тузган торак проблемасы хәл итүгә юнәлтелгән дә инде. Эмиль Хөснетдинов сүзләренә караганда, иске йортларда яшәүчеләрнең торак алу мөмкинлеге юк.
Бу максатларга 4 674 456, 675 мең сум акча кирәк булачак. Аның 2 337 228,338 мең сумы – Торак–коммуналь хуҗалыкны реформалаштыруга ярдәм итү фондыннан, 1 869 782,670 мең сумы – Татарстан Республикасы һәм муниципаль бюджетыннан, 467 445, 667 мең сумы бюджеттан тыш чыганаклардан җәлеп ителәчәк.