Быел ремонтны яхшырак ясаячаклар

 

2012 елда капиталь төзекләндерү программасы турында сөйләшкәндә республика җитәкчелеге әнә шул хакта хәбәр итте. 4 февраль көнне Хөкүмәт йортында узган традицион киңәшмәдә Татарстан Президенты Рөстәм Миңнеханов подрядчы оешмаларның программага елдан-ел яхшыларын гына кертелә баруын ассызыклады. Ремонт материалларын урлау мәсьәләсендә дә уены-чыны белән: “Төзекләндерүчеләр аны урлау дип түгел, ә башка максаттта күчерү (перераспределение) дип атый”, диде. Республика җитәкчесе сүзләренә караганда, акча әрәм-шәрәм ителмәсен өчен материаллар электрон сәүдә системасы аша сатып алынырга тиеш. Бу эшне киңәшмә вакытында Президент мартка кадәр төгәлләргә кушты.

 

 

Агымдагы елда республиканың 843 күп фатирлы йортына ремонт ясалырга тиеш. 17 муниципаль берәмлектәге эш 145 йортта инде бүген үк кызу темпта бара. Ә менә Алабуга, Әлки районнарында узган елгы ремонт буенча да исәп әзер түгел. Бер тәүлек эчендә кадастр паспорты, исәп җайланмалары һәм башкалар буенча хисап бирелмәсә, бу районнарда быел ремонтның бөтенләй булмавы ихимал. Аларда төзекләндерүгә әле тотынмаганнар да. Шулай итеп, республика җитәкчелегенең каты кулы белән Татарстанда капиталь ремонт программасы сыйфаты артыр, дип ышанасы килә. 

 

Рөстәм Миңнеханов эшкә берни дә, беркем дә комачауларга тиеш түгел дигән фикердә. “Нинди проблемалар, тәкъдимнәр бар, безгә мөрәҗәгать итегез.  Торак коммуналь оешмалар белән авырлыклар туса, хәл итәрбез. Эшне октябрьгә төгәлләргә кирәк”, -диде ул.

 

 

Татарстан Президенты мәктәпләрне яңарту программасын башкаручыларга тагын да зуррак таләпләр куелачагын хәбәр итте. Аны вакытында үтәмичә, уку процессына кыенлыклык китергән йә моңа бирелгән акчаны үз кесәсенә күчергән өчен җаваплы кешеләр җәзасын алачак.

 

“Балалар малын урлау зур гөнаһ. Без болай да аларны искергән биналарда укыткан өчен гаепле. Һәр бала мәктәптә ун елын уздыра, аның сәламәтлеге әйләнә-тирәдәге мохиткә - мәктәптәге яктылык, җылылыкка бәйле”, дип билгеләп узды Татарстан башлыгы Рөстәм Миңнеханов. 

 

Ул бүгенге утырышта мәктәпләрдә әти-әниләр белән киңәшләшеп, язгы һәм көзге каникулларны да укырга, ә җәйге ялга майдан ук чыгарга тәкъдим итте. Чөнки ремонт җылы вакытта башланса, аны тиз арада төгәлләп булачак.

 

Программа нигезендә алдагы өч елда 787 иске бинадагы мәктәпне яңарту күздә тотыла. Быел 145 белем йортында эш башкарылачак. Республиканың төзелеш, архитектура һәм торак-коммуналь хуҗалыгы министры Ирек Фәйзуллин ассызыклаганча, тагын 13 коррекцион мәктәпне дә ремонтлау карала. Алар буенча хәзер документлар әзерләнә. Быел 1,548 миллион сум акчага иске мәктәпләрнең түбәсе, ишек-тәрәзәләре, инженер коммуникацияләре алыштырылачак. 

 

Рөстәм Миңнеханов ремонтның барлык районнардагы мәктәпләрдә башкарылачагын ассызыклап, быелгы программага кергән корылмалар буенча әзерлек эшләрен мартка кадәр төгәлләргә кушты.