Ленин дамбасын япмыйлар, шәһәр үзәгендә яңа биналар бүтән төзелмәячәк

 

Утырышта шәһәр башлыгы Илсур Метшин чыгышыннан аңлашылганча, “башкала үргә менеп баручы альпинистны хәтерләтә”.  Күп яклы өлкәләрне үз эченә алган төп докладында мэр Казан хакимияте ирешкән уңышларны саннар китереп җиткерде. 2011 елда башкаланың 424 йорты  капиталь төзкләндерелгән, 18 яңа балалар бакчасы ачылган, мәктәп укучыларын тукландыру системасы булдырылган (көненә 45 сум), юлларга 1,5 млн. квадрат метр асфальт салынган (бу санны Илсур Метшин 300 футбол кыры белән чагыштырды), халыкның уртача хезмәт хакы 22,3 мең сумга кадәр күтәрелгән.

 

“Елга буенда урнашкан һәр шәһәрнең диярлек  яр буе төзекләндерелгән, ял өчен уңайлаштырылган. Ә безнең шәһәр үзәгендә Казансу була торып, бүгенгә кадәр яр буебыз юк. Нәшрият бинасыннан футбол стадионына кадәр, Кремль ягында Подлужный урамына кадәр Казансу буен төзекләндерергә уйлыйбыз. Бу эшкә шәһәр бюджеты чаралары гына җитми”, - дип, Президентның ярдәм күрсәтүен сорады шәһәр башлыгы Илсур Метшин.

 

 

Йомгаклау утырышында Казанның иң зур проблемасы - бөкеләрдән арыну юллары да тәкъдим ителде. Илсур Метшин китергән саннарга караганда, башкалада 2012 елга 207 мең автомобиль хәрәкәт иткәнлеге мәгълүм. Бөкеләрдән арыну юлын мэр яңа юллар төзелеше, җәмәгать транспортын җайга салу, кагыйдәләрне бозмаучы автомобиль йөртүчеләр тәрбияләү аша күрә. Ә Президент Рөстәм Миңнеханов бу мәсьәләгә башкача карый. Шәһәр үзәгенә автомобиль белән килү кыйммәт булган очракта, халык җәмәгать транспортыннан файдалана башлар, бөкеләр сизелерлек кимер дигән фикер җиткерде ул. Җәмәгать транспорты өчен аерым юллар, яңа транспорт, такси хезмәтен җайга салу, паркинглар булдыру кебек алымнар бөкеләр белән көрәш юлында файда китерәчәге ассызыкланды.

 

Рөстәм Миңнеханов төп мәсьәлә итеп Казан үзәгенең артык тулы булуын, машина агымының иң зурысы шәһәр үзәгенә таба булуын төп проблема буларак билгеләп үтте. Ул ассызыклаганча, эш урыннарының шактые үзәктә булу сәбәпле күпчелек халык көн саен шәһәр үзәгенә агыла. “Булган биналарны саклап, яңа төзелешләрне башламау мәсьәләсен хәл итәргә кирәк”, - диде ул.

 

Ленин дамбасын быел яңартуны төп максат итеп билгеләделәр, әмма төзелеш барышында күпер ябылуга шәһәр халкы тискәре караш белдерде. “Күперне япмаячакбыз. Нинди дә булса юлын табарбыз”, - дип ышандырды Рөстәм Миңнеханов. Оборона министрлыгы белән понтон күперен куллануның күздә тотылуын ассызыклады Президент.

 

 

 “Бәләкәч” программасы төгәлләнсә дә, Президент киләчәктә балалар бакчаларына игътибар кимемәячәген ассызыклады. Мэр Илсур Метшин балалар бакчаларын киләчәктә капиталь төзекләндерү програмасы булдырылачагы турында да хәбәр җиткерде. Әмма соңгы өч елда хакимият мәктәпләрне төзекләндерүгә тотынмакчы. Президент һәр депутатка әлеге эшне контрольдә тотарга тәкъдим итте. “Депутатлар сессиядән сессиягә генә йөрмәсенннәр, эш белән дә шөгыльләнсеннәр”, - диде Рөстәм Миңнеханов. Мәктәпләрне төзекләндерү мәсьәләсендә каникулларны күчерүне әти-әниләр комитетында хәл итәргә тәкъдим ителде. Президент ремонт вакытында төгәлләнәчәгенә ышандырды.

 

2012 ел Тарихи мирасны саклау елы буларак игълан ителү уңаеннан Казанның тарихи йөзен саклау мәсьәләсе дә үзәк урында булды. Шулай ук башкалада йөзгә якын яшелләндерелгән урыннар булдырырга планлаштыралар.