Рөстәм Миңнеханов: «Төзелешне алып баруда финанс кыенлыклар юк, бары тик эшне оештыра белергә кирәк»

2008 елның дүрт аенда 720 мең квадрат метр торак кулланышка кертелгән, әмма бу узган ел резерв мәйданнар ярдәмендә ирешелгән квадрат метрлар, дип билгеләп үтте ТР Премьер-министры Рөстәм Миңнеханов торакны кулланышка тапшыру мәсьәләсенә багышланган видеокиңәшмәдә.
Яңа төзелеш сезоны башланды, торакның төп күләмен 2-3 кварталларда төзеп бетереп, 4 кварталга вак-төяк эшләрне төгәлләүгә калдырырга гына була, диде Хөкүмәт башлыгы.
«Төзелешне алып баруда финанс кыенлыклар юк, бары тик эшне оештыра белергә генә кирәк», - дип ассызыклады ул. 
ТР Төзелеш, архитектура һәм торак-коммуналь хуҗалык министры Марат Хөснуллин үз чыгышында әйтеп узганча, гомумән Татарстан буенча еллык биремнең 33 проценты үтәлгән, бу узган ел күрсәткечләреннән 1,3 тапкырга артыграк. Шул ук вакытта торак төзелеше программасында елдан ел активрак төзелеш алып бару таләп ителә. Шуңа күрә 2009 елга резерв булдыру турында хәзер үк уйланырга кирәк, диде М.Хөснуллин.
Баулы, Буа, Саба районнары торакны сафка бастыру буенча биремне 60 процентка башкарган. Әлмәт, Бөгелмә, Зәй, Лаеш районнары төзелеш эшләре буенча графиктан калыша. Яңа Чишмә, Ютазы, Менделеев районнары еллык биремне бары 12 процентка гына үтәгән.
Шулай ук министр сүзләренә караганда, узган ел тиз торгызыла торган йорт күп төзелгән иде, әмма коммуникацияләр белән мәсьәлә чишелмәгәнгә күрә, аларда әлегә кадәр яшәүче юк. Быел исә бу проблеманы чишеп була, әлеге ихтыяҗларга 1,5 млрд. сум бүлеп бирелә (500 млн.сум — юлларга, 500 млн.сум — төзекләндерүгә, 500 млн. сум  - коммуникацияләргә).
Техник инвентаризацияләү бюросы мәгълүматларына караганда, 1 майга республикада резервта 1 млн.244 мең квадрат метр күләмендә югары әзерлектәге торак бар, шул исәптән Казанда — 742 мең квадрат метр. Министр әйткәнчә, булган резервлар елны уңышлы тәмамлауны тәэмин итә ала.
Шулай ук киңәшмәдә Марат Хөснуллин РФ Конституция суды карары нигезендә, бакча участокларында төзелгән корылмаларда гражданнар теркәлә алуын искә төшерде. Шул нисбәттән, бакчачылыкларда коммуналь инфраструктуралар белән тәэмин ителеш, генераль планнарга үзгәрешләр кертү кебек мәсьәләләр килеп басачак, дип искәртте министр, муниципаль берәмлекләр вәкилләренә мөрәҗәгать итеп.
Видеокиңәшмәдә социаль ипотека программасы буенча төзелеш акрын темплар белән баруы турында ассызыкланды.
Социаль ипотека программасы буенча агымдагы елда 709 мең квадрат метрны кулланышка кертү планлаштырыла. Бүгенге көнгә бары тик якынча 9 мең квадрат метр торак тапшырылган. Әлеге күрсәткечләр шул исәптән документларны рәсмиләштермәүнең нәтиҗәсе дә.
ТР Премьер-министры: «Финанс тәэмин ителештә проблемалар юк, бары тик муниципаль берәмлекләрдә сыйфатлы итеп эш оештыра белергә генә кирәк», - дип ассызыклады.