ТР Төзелеш министрлыгы: Татарстан территорияләрне комплекслы үстерү үрнәге булырга тиеш
Хәзерге вакытта республиканың 31 муниципаль районы шәһәр төзелешенең яңа стандартларын сынап карау өчен участоклар бирергә әзер. Татарстан алдына территорияләрне комплекслы үстерү стандартларын (ТКY) кертү буенча Рәссәй төбәкләре өчен үрнәк булу бурычы куелган. Бу хакта ТР Дәүләт Советының Торак сәясәте һәм инфраструктура үсеше буенча комитетының күчмә утырышында ТР Төзелеш, архитектура һәм торак-коммуналь хуҗалык министры урынбасары Владимир Кудряшев хәбәр итте. Хәзерге вакытта республиканың 18 муниципаль районы территорияләрне планлаштыру һәм кирәкле инфраструктураны тоташтыру буенча документлар таләп ителә торган җир кишәрлекләрен карап тикшерүгә тәкъдим итте. Унике муниципаль район комплекслы үсеш өчен берничә территория бирү мөмкинлеген карый гына. Муниципалитетлар арасында бигрәк тә Казан шәһәре тора, анда шулай ук комплекслы үсеш буенча тәкъдимнәр керде. «Казанда ТKY эше механизмнарын торак булмаган төзелеш территорияләрендә сынап карау планлаштырыла», - дип аңлатты министр урынбасары. Татарстанның 14 районында әлегә территорияләрне комплекслы үстерү өчен участоклар юк, диде спикер. «Территорияләрне комплекслы үстерү турында кабул ителгән закон төбәкләргә законнар дәрәҗәсендә шактый зур мөмкинлекләр бирә. Федерация субъектларының бу өлештә төрле вәкаләтләре барлыкка килде, шул исәптән әлеге программаларга кертелергә мөмкин булган күпфатирлы йортларның техник характеристикаларын билгеләү буенча да», — дип өстәде ул.