ТР Төзелеш министрлыгы башлыгы социаль-мәдәни өлкә объектларын һәм күп фатирлы йортларны капиталь ремонтлау турында сөйләде

ТР Төзелеш, архитектура һәм торак-коммуналь хуҗалык министры Марат Айзатуллин ТР Хөкүмәт Йортында узган республика киңәшмәсендә социаль-мәдәни өлкә объектларын капиталь ремонтлау эшләренең барышы турында сөйләде.

Министр билгеләп үткәнчә, традицион рәвештә иң зур өлкә – мәгариф. Биредә 6 программа гамәлгә ашырыла. Барлыгы 8 балалар бакчасын һәм 42 мәктәпне яңарту планлаштырыла. 143 мәктәптә азык-төлек блогы һәм 2 спорт залы ремонтланачак. Урта һөнәри белем бирү звеносында 9 ресурс үзәге һәм 4 ятагы яңартылачак. Кайбер объектларда ремонт эшләре башланды инде.

Яшьләр сәясәте өлкәсендә 5 программа гамәлгә ашырыла. Бүгенге көндә 8 яшьләр үзәге (27 процент), 4 яшүсмерләр клубы (16 процент) һәм 6 балалар сәламәтләндерү лагеры (10 процент) ремонтлана.

Экология һәм табигый ресурсларны саклау өлкәсендә 2 программа чарасы гамәлгә ашырыла. Эшләр 7 объектта алып барыла. Программа буенча башкару гомумән алганда 14% тәшкил итә. Калган объектлар буенча эшләр апрельдә, су басу тәмамланганнан соң башланачак.