Марат Айзатуллин Дербышкида ишегалды бәйрәмендә катнашты

2023 елның 1 июне, пәнҗешәмбе

Рөстәм Миңнеханов бүген, Халыкара балаларны яклау көнендә, Казанның Дербышки посёлыгында ишегалды бәйрәмендә булды. Аны ТР Төзелеш, архитектура һәм торак-коммуналь хуҗалык министры Марат Айзатуллин һәм Казан мэры Илсур Метшин озатып йөрде.

Ишегалды территориясен төзекләндерү тәмамлану уңаеннан бәйрәм чарасы Халезов урамындагы 4, 6 нчы йортлар һәм Совет урамындагы 19, 21 нче йортлар ишегалдында узды. Биредә яңа балалар уен зонасы, спорт мәйданчыгы, уңайлы эскәмияләр барлыкка килде, асфальт-бетон япма яңартылды, территорияне яшелләндерү буенча эшләр башкарылды. Барлык үзгәрешләр йортларда яшәүчеләр белән тикшерелде.

Рөстәм Миңнеханов яңартылган ишегалдын карады, балалар өчен оештырылган төрле активлык зоналарында булды, халык белән аралашты.