Татарстанда илкүләм проектлар кысаларында программаларны гамәлгә ашыру тәмамлана
Социаль-мәдәни объектлар төзү, коммуналь инфраструктураны модернизацияләү һәм төзекләндерү программалары турында ТР Хөкүмәте Йортында узган атналык киңәшмәдә ТР Төзелеш, архитектура һәм торак-коммуналь хуҗалык министры Марат Айзатуллин хәбәр итте.
Торак төзелешенә ярдәм итүгә юнәлдерелгән ике федераль программаның 72% үтәлеше белән «Торак» федераль проекты буенча 9 объектта эш калган. Узган 2 атна эчендә Лаеш районында 4 объектта - 2, Яшел Үзән районында һәм Яр Чаллы шәһәрендә берәр объектта эшләр төгәлләнде.
«Демография» илкүләм проекты кысаларында агымдагы атнада Казанның 59нчы кварталындагы икенче балалар бакчасында төзелеш-монтаж эшләре тәмамланды.
«Мәдәният» тармагы буенча гамәлгә ашырыла торган ике программа кысаларында 12 учреждениедән икесе эшли. Гомумән алганда, барлык объектлар буенча әзерлек 98% тәшкил итә. Агымдагы атнада Биектау районында 45 урынга исәпләнгән авыл мәдәният йорты төзелеше тәмамланды.
«Экология» илкүләм проектына кергән объектлар буенча ике объект тулысынча тәмамланган - бу Казан шәһәрендәге Самосыров полигонын рекультивацияләү һәм Түбән Кама сусаклагычындагы торба үткәргечләрне демонтажлау. Агымдагы ел лимитлары кысаларында биологик чистарту корылмаларын реконструкцияләү һәм Казан шәһәрендә балчык басуларын рекультивацияләү эшләре төгәлләнде.
Куйбышев сусаклагычының яр ныгытмасы Кама Тамагы «Табигый ресурсларны яңадан җитештерү һәм куллану» дәүләт программасының бер өлеше булып тора. Хәзерге вакытта үтәлеш 94% тәшкил итә.