Татарстан районнары җәмәгать урыннарын төзекләндерү конкурсында активлык күрсәтә
Татарстан районнары арасында төзекләндерү өчен территорияләр сайлау буенча Бөтенроссия тавыш бирүендә Татарстанның Саба, Арча һәм Биектау муниципаль районнары халкы актив катнаша. Анда инде көтелгәннән күбрәк гражданнар тавыш бирде. Шулай ук республиканың Мөслим, Зәй һәм Әлки, Теләче, Балтач районнары халкы да активлык күрсәтә.
Халык санын исәпкә алып, хәзерге вакытта Казанда тавыш бирүчеләр саны план белән чагыштырганда түбәнрәк. Шул ук вакытта Татарстан башкаласыннан тавыш бирүдә 24 җәмәгать урыны катнаша. Активлыгы түбән булган тагын бер район – Чистай районы. Аз гына аерма белән, шулай да артта калучылар арасында Чаллы да бар.
ТР Төзелеш, архитектура һәм торак-коммуналь хуҗалык министрының беренче урынбасары Алексей Фролов хәбәр иткәнчә, быел Татарстаннан төзекләндерү өчен территорияләр сайлау буенча Бөтенроссия тавыш бирүендә барлык 45 муниципаль берәмлектә 273 җәмәгать урыны, шулай ук 1,55 мең йорт катнаша.
Алексей Фролов татарстанлыларны активрак тавыш бирергә дәште, чөнки тавышлар күбрәк булган саен, объектлар күбрәк ярдәм алачак һәм киләсе елда халыкка шатлык китерәчәк.
Тавыш бирү 15 марттан 30 апрельгә кадәр gorodsreda.tatar.ru сайтында яки порталда һәм «ТР Хезмәтләре» кушымтасында уза. Объектларны төзекләндерү өчен «Уңайлы шәһәр мохитен формалаштыру» федераль проекты кысаларында «Торак һәм шәһәр мохите» илкүләм проекты сайлап ала.
Конкурс 2017 елда башланды. 2023 елга кадәр республикада 225 объект төзекләндерелгән. Инвестицияләнгән акчаларның гомуми суммасы 23,9 млрд сумнан артып китә: Россия бюджетыннан 7,98 млрд сум, Татарстан казнасы 13,07 млрд сум бүлеп бирә. Аерым алганда, узган ел Татарстанда 2,9 млрд сумлык 68 җәмәгать урыны төзекләндерелгән. 2024 елда 2,4 млрд сумлык 64 җәмәгать урынын төзекләндерү буенча эшләр планлаштырылган.