Рөстәм Миңнеханов дини әһәмияттәге объектларны карады
Татарстан Рәисе Рөстәм Миңнеханов бүген Казандагы объектларда булды. Аны Казан мэры Илсур Метшин, Республика Рәисе ярдәмчесе Олеся Балтусова, мәдәни мирас объектларын саклау буенча Татарстан Республикасы Комитеты рәисе Иван Гущин, Татарстан Республикасы Төзелеш, архитектура һәм ТКХ министры урынбасары Владимир Кудряшев озата йөрде.
Беренче объект Казан Богородица монастыре булды. Өч ел элек биредә яңадан торгызылган Казан Мәрьям Ана иконасы соборы ачылган. Монастырь комплексын алга таба торгызу эшләре Татарстан Республикасы Рәисе йөкләмәләре исемлеген үтәү кысаларында башкарыла. 2024 елның мартында объектта әзерлек һәм проектлау эшләре башланды. Бүгенге көндә конструкцияләрне һәм фундаментларны тикшерү эшләре башкарылган, соңгы конструкцияләр демонтаж ителгән, архив тикшеренүләре башкарылган, сак предметлары эшләнгән һәм расланган, беренче чираттагы аварияләргә каршы чаралар проектлары эшләнгән.
Казан епархиясе инициативасы нигезендә, комплексның өстенлекле объекты итеп Никола Тульский чиркәве бинасы билгеләнде. Силикат кирпечтән торган әлеге бинаның өченче катын ныклыгын саклап калган тарихи дәрәҗәгә кадәр демонтажлау планлаштырыла. Бүген шулай ук Настоятель корпусы астындагы подвалларны ачуга әзерлек эшләре алып барыла.
Аннары республика башлыгы 1823 елда төзелгән храм-һәйкәлне ремонтлау-торгызу эшләренең барышы белән танышты. Һәйкәл биек постаментка күтәрелгән 20 метрлы дүртпочмаклы кисеп ясалган пирамидадан гыйбарәт. Төрле елларда биредә ремонт эшләре башкарылган. Быел гыйбадәтханәне масштаблы реставрацияләү башланды, ул 2026 елда тәмамланырга тиеш. Моннан тыш, тиешле инфраструктура белән комплекслы төзекләндерү планлаштырыла - биредә җәяүлеләр юлы, санитария узеллары, шулай ук елга трамвайчылары өчен причал барлыкка килергә тиеш.
Аннары Рөстәм Миңнеханов 1802 елда төзелгән «Иске таш» мәчетендә булды. Ремонт-торгызу эшләре 2023 елда башланган, 2024 елның августында тәмамланган. Ресторация «Тарихи хәтер» проекты кысаларында федераль акчалар хисабына алып барылды. Татарстан рәисенә янәшәдәге территорияне алга таба үстерү концепциясен тәкъдим иттеләр
Рөстәм Миңнеханов төзекләндерелгән «Әл-Мәрҗани» мәчетен карап чыкты. Аны 18 йөзнең икенче яртысында төзегәннәр. Ул Татарстан башкаласында төзелгән беренче таш мәчетләр рәтенә керә. Аварияләргә каршы чаралар кысаларында мәчетнең гөмбәзләре һәм фасадларындагы ярыкларны, манараны һәм түбәсен ремонтлауны да кертеп, барлык конструкцияләрне көчәйттеләр. Вентиляция, җылыту, кондиционер системалары алыштырылды, суүткәргеч һәм электр белән тәэмин итү челтәрләре яңартылды. Реставраторлар фасадларга барокко стилендәге тарихи кыяфәтен кайтарганнар, декорны, тәрәзәләрне һәм декоратив-нәфис металл эшләнмәләрен торгызганнар.
Республика башлыгы агымдагы елның августында «Әл-Мәрҗани» мәчетен карап чыгу йомгаклары буенча ремонт-торгызу эшләрен төгәлләү, аерым алганда, эчке интерьерларны бизәү, юыну бүлмәләренең җылы идәннәрен төзекләндерү, территорияне төзекләндерү, шулай ук музей киңлеген оештыру буенча йөкләмәләр бирелде. Хәзерге вакытта реставрация тулы күләмдә төгәлләнгән.