2026 елда кайсы парклар һәм ишегаллары төзекләндереләчәк: Татарстанда Бөтенроссия тавыш бирүенә йомгак ясалды
21 апрельдән 12 июньгә кадәр Татарстан халкы сигезенче тапкыр 2026 елда төзекләндереләчәк паркларны, скверларны, яр буйларын, урамнарны һәм ишегалларын сайлады. Исемлеккә бөтен республика буенча 283 җәмәгать урыны һәм 812 ишегалды кертелде.
Тавыш бирүдә 416 357 кеше катнашты. Шул исәптән 130 057 кеше – Казаннан, 56 113 – Яр Чаллыдан, 28 905 – Түбән Камадан. Шул ук вакытта Югары Ослан, Биектау, Чүпрәле һәм Мөслим районнары актив тавыш бирде. Республиканың 45 районының һәркайсында тавыш бирүдә үз җиңүчесе (киләсе елда төзекләндереләчәк урын) бар.
Җиңгән объектлар исемлеген түбәндәге сайтларда табарга була: park.tatar һәм dvor.tatar.
Казанда күпчелек тавышны Мәскәү районының Декабристлар һәм Восстание урамнары киселешендә урнашкан «Тәбриз» скверы җыйды. Яр Чаллыда Фикрәт Табиев исемендәге Яр буе, Түбән Камада тавыш бирү нәтиҗәләре буенча «Гаилә» паркын төзекләндерү дәвам итәчәк.
2026 елда ТР Рәисе Рөстәм Миңнехановның «Безнең ишегалды» республика программасы буенча төзекләндереләчәк 812 ишегалды территориясеннән халык 200 ишегалды билгеләде. Ишегаллары өчен барлыгы 194 710 татарстанлы тавыш бирде.
Ишегаллары исемлеге сайттагы «Документлар» бүлегендә «Программа турында» вкладкасында бастырылган инде https://dvor.tatar/docs/.
Исегезгә төшерәбез, Россия күләмендәге тавыш бирү «Яшәү өчен bнфраструктура» илкүләм проектының бер өлеше булган «Уңайлы шәһәр мохитен формалаштыру» федераль программасы кысаларында үткәрелә. Ул халыкка үз районында яңарту өчен парк яки ишегалды сайлау мөмкинлеге бирә.
Фотосурәттә: Казандагы «Тәбриз» скверы