Бүген Яр Чаллыда Россиянең иң яхшы сметачысын сайлаячаклар
Бүген Яр Чаллыда «Иң яхшы сметачы - 2025: индустриаль мирас» Бөтенроссия конкурсының финал этабы уза.
Конкурс 12 мәртәбә уздырыла һәм төзелеш өлкәсендә һөнәри осталык буенча абруйлы конкурсларның берсе булып тора. Аның максаты – бәя кую һәм смета нормалаштыру өлкәсендә белгечләр эшчәнлегенең нәтиҗәлелеген күтәрү.
Конкурс өч этаптан тора, аларның икесе дистанцион форматта узган инде. Беренче этап барышында үтелгән тест нигезендә теоретик белемнәргә бәя бирелде. Икенче этапта катнашучылар иҗади презентацияләр тәкъдим иттеләр. Ике этап нәтиҗәләре буенча һәр катнашучыга тиешле баллар бирелде.
2025 елда конкурста 21 төбәктән: Башкортостан, Карачай-Черкес, Саха (Якутия), Татарстан, Удмуртия, Хакасия Республикаларыннан, Белгород, Калининград, Киров, Ленинград, Мәскәү, Оренбург, Ростов, Рязань, Самара, Свердловск, Тверь, Чиләбе һәм Ярославль өлкәләреннән, Красноярск һәм Ставрополь өлкәләреннән 61 кеше катнаша, шулай ук Казахстан Республикасыннан да вәкилләр бар.
Конкурсның финал этабын ачуда сәламләү сүзе белән Татарстан Республикасы Төзелеш, архитектура һәм торак-коммуналь хуҗалык министры Марат Айзатуллин чыгыш ясады. Ул, аерым алганда, билгеләп үткәнчә, конкурс һөнәрнең абруен күтәрә, яшьләрне җәлеп итә, яңа заман бурычларын хәл итәргә сәләтле кадрлар резервын формалаштыра.
«Татарстан һәрвакыт диалогка ачык, цифрлы чишелешләр кертә һәм федераль дәрәҗәдә тәҗрибә уртаклашырга әзер. Без хезмәттәшлек һәм гадел һөнәри конкуренция аша гына алга барырга мөмкин, дип ышанабыз», – диде Татарстан Республикасы Төзелеш министрлыгы башлыгы.