Татарстанда гомуми белем бирү оешмаларына һәм мәктәп азык-төлек блокларына капиталь ремонт программалары төгәлләнде

«Яңа уку елына әзерлек финиш сызыгына якынлаша. Беренче сентябрьгә дүрт республика һәм дүрт федераль программа кысаларында барлык 213 мәгариф объекты ремонтланачак», – дип хәбәр итте ТР Төзелеш, архитектура һәм торак-коммуналь хуҗалык министры Марат Айзатуллин ТР Хөкүмәте Йортында үткәрелгән республика киңәшмәсендә.

Киңәшмәне Татарстан Республикасы Рәисе Рөстәм Миңнеханов үткәрде. Барлык муниципаль районнар белән видеоконференцэлемтә режимында узган киңәшмәдә ТР Премьер-министры Алексей Песошин катнашты.

Мәктәпкәчә белем бирү учреждениеләре буенча эшләр 98 процентка тәмам. Соңгы 2 атнада ремонт эшләре тәмамланган 3 балалар бакчасын исәпкә алганда, 9 объект тапшырылган инде. Быел барлыгы 11 балалар бакчасы ремонтлана.

Сарман һәм Яшел Үзән районнарында 8 ресурс үзәген ремонтлау эшләре, хисап чорында тапшырылган ике объектны исәпкә алып, 99 процентка башкарылган.

Гомуми белем бирү оешмаларына капремонт, 74 мәктәп азык-төлек блогына ремонт программалары тулысынча төгәлләнгән. Шулай ук тулай торакларны ремонтлау программасы төгәлләнгән – Баулы, Кукмара районнарында һәм Казанда объектлар тапшырылган.

Шулай итеп, мәгариф өлкәсендә 3 программа төгәлләнгән. «Әлеге казаныш – белгечләрнең, подряд оешмаларының, профильле ведомстволарның һәм муниципалитетларның җаваплы һәм бердәм хезмәте нәтиҗәсендә ирешелгән әһәмиятле нәтиҗә», – диде Марат Айзатуллин.