Төзелеш тармагында хезмәт иминлеген саклау буенча ачыкланган хокук бозуларның 97% тан артыгы бетерелгән
Төзелеш комплексында җитештерү барышында имгәнү очракларын кисәтү буенча профилактик эш туктатылмый. Бу хакта узган шимбәдә Татарстан Хөкүмәте Йортында узган киңәшмәдә ТР Төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин хәбәр итте.
Киңәшмәне барлык муниципаль районнар белән видеоконференцэлемтә режимында Татарстан Премьер-министры Алексей Песошин уздырды.
Дамир Шәйлуллин билгеләп үткәнчә, гадәттән тыш хәлләр санын киметүгә контроль-күзәтчелек чаралары юнәлдерелгән.
«Агымдагы ел башыннан үз-үзен җайга сала торган оешмалар 2127 тикшерү уздырган. Дисциплинар йогынты чаралары 939 очракта кулланылган, – диде ТР Төзелеш министрлыгы башлыгының беренче урынбасары. – Административ җаваплылык турында 441 карарны Дәүләт төзелеше күзәтчелеге инспекциясе белгечләре чыгарды. Гомумән алганда, ел башыннан ведомстволар 1395 тикшерү оештырган».
Баш инвестиция-төзелеш идарәсе 2355 контроль-күзәтчелек чарасы уздырган. Ачыкланган 5160 хокук бозуның 5010ы инде бетерелгән, бу 97% тан артып китә.
Д.Шәйдуллин төзелеш процессында катнашучыларның игътибарын хезмәт иминлеген саклау буенча таләпләрнең фаҗигале тәҗрибәне исәпкә алып формалаштырылуына юнәлтте, шуңа күрә аларны төгәл үтәргә кирәк.