Казанда СИЗОның яңа бинасы ачылды
Казанда яңа тикшерү изоляторы ачылды. Объектта Татарстан Рәисе Рөстәм Миңнеханов, Россия Федерациясе Юстиция министры Константин Чуйченко, Җәзаларны үтәтү федераль хезмәте директоры Аркадий Гостев, Россия Федерациясе Президентының Идел буе федераль округындагы Тулы вәкаләтле вәкиле Игорь Комаров, Татарстан Республикасы Төзелеш министрлыгы башлыгы Марат Айзатуллин булды.
СИЗОның яңа бинасын төзү 2022 елда башланды. Объект мең кешегә исәпләнгән. Төзелеш мәйданы якынча 22 мең кв. м тәшкил иткән.
Рөстәм Миңнеханов билгеләп үткәнчә, тикшерү изоляторы заманча төзелеш материалларын һәм яңа технологияләрне кулланып, махсус контингентны саклауда һәм урнаштыруда кыска вакыт эчендә төзелгән.
Тикшерү изоляторы составына административ бина, 6 режимлы корпус, шул исәптән шикләнелүче һәм гаепләнүче хатын-кызларны һәм балигъ булмаганнарны урнаштыру өчен аерым корпус, җыю-тикшерү бүлеге, озак һәм кыска вакытлы очрашулар корпусы, транзит-күчерү пункты корпусы, амбулаторияле медицина часте корпусы, кер юу бүлмәсе, УИС хезмәткәрләре өчен ашханә, склад бинасы, гаражы, ремонт һәм юу зонасы керә. Яңа СИЗО шикләнелүчеләрне һәм гаепләнүчеләрне тотуның заманча таләпләренә тулысынча туры килә.
Медицина өлеше уңайлы хастаханә палаталары һәм заманча җиһазлар белән тәэмин ителгән, шул исәптән инвалидлар һәм башка категориядәге аз хәрәкәтләнүче гражданнар өчен дә. Аның составына амбулатория, стационар, медицина изоляторы, стационар каршындагы ял итү ишегаллары керә.
Тикшерү изоляторында хуҗалык хезмәте күрсәтү отрядының хөкем ителүчеләре белән аларның туганнары белән озак вакытлы күрешүләр уздыру өчен биналар, шикләнелүчеләр, гаепләнүчеләр һәм хөкем ителүчеләрнең кыска вакытлы күрешүләре вакытында телефон сөйләшүләре өчен кабиналар бар.
Яңа учреждениенең үзенчәлеге – барлык режимлы биналар үзара күчеш галереяләре белән тоташтырылган, шуңа күрә урамга чыгу кирәге юк.