Төзүчеләр Түбән Камадагы 1 нче гимназиягә капиталь ремонт ясый башлады
Түбән Камада Муса Җәлил исемендәге 1 нче гимназиягә капиталь ремонт ясала.
Гомуми мәйданы 6885 кв. м булган мәгариф учреждениесе бинасы Гагарин урамында урнашкан. Комплекслы капиталь ремонттан тыш, биредә территорияне төзекләндерү, яңа җиһазлар кайтару һәм урнаштыру планлаштырылган.
Хәзер биналарда сүтү эшләре, җылыту, су, канализация һәм электр белән тәэмин итү системаларын ремонтлау төгәлләнеп килә. Төзүчеләр бизәү эшләрен башкаруга кереште. Оператив үтәлеш 11% тәшкил итә.
Гимназиягә капиталь ремонт заманча, имин һәм уңайлы белем бирү мохите булдыру уңаеннан ясала.
Исегезгә төшерәбез, агымдагы елда федераль һәм республика программалары буенча Татарстанда 55 мәктәпкә капиталь ремонт ясау планлаштырылган.
Әйтик, «Яшьләр һәм балалар» илкүләм проектының «Балаларга иң яхшысы» федераль программасы паспорты белән 18 муниципаль берәмлектә 36 мәктәп яңартылачак, гомуми суммасы 3,2 млрд сумнан артык.
Моннан тыш, мәгариф объектларын капиталь ремонтлау республика программасына 1,86 млрд сумга якын финанслау белән 19 мәктәп кертелгән.