ТР Хөкүмәт йортында Татарстанда 2014 елда төзелеш өлкәсендә 25 программаны гамәлләштерү буенча киңәшмә үтте

Бүген Хөкүмәт йортында төзелеш, архитектура һәм торак-коммуналь хуҗалык министры Ирек Фәйзуллин 2014 елда Татарстан Республикасында төзелеш өлкәсендәге 25 программаны үтәү мәсьәләләре турында сөйләде. Татарстан муниципаль берәмлекләре белән видеоконференция тәртибендә узган киңәшмәне ТР премьер-министры Илдар Халиков алып барды.
Ирек Фәйзуллин хәбәр итүенчә, 2014 елда гамәлләштерәчәк 25 программаның 14 буенча инде ТР Министрлар кабинетында тиешле карарлар кабул ителгән, 10 программа буенча исә андый карарлар таләп ителми.

Аерым алганда, 2013 елда авария хәлендәге торакларны бетерү программасы кысаларында алып барылган эшчәнлек нәтиҗәләре буенча Ирек Фәйзулин Мамадыш муниципаль районын билгеләп үтте, анда авария хәлендәге 9 барактан 26 гаилә күчерелгән. 2014 елда 529 йорттан яисә 3 мең 858 торактан 9 мең 464 кеше күчерелер дип көтелә.

Социаль ипотека программасы буенча 2014 елда эксплуатациягә гомуми мәйданы 383,9 мең кв.м. булган 6 мең 636 фатирлы 120 йорт файдалануга тапшырылачак. Бюджеттан тыш чыганаклардан финанслау күләме 14 млрд. 600 млн. сум тәшкил итәчәк.

2014 елда 295 ятим баланы торак белән тәэмин итү планлаштырылган.
Бөек Ватан сугышында катнашкан 461 ветеранның торак шартларын яхшырту өчен, 2014 елда федераль программа кысаларында, федераль бюджеттан 525,1 млн. сум акча бүлеп биреләчәк.
Татарстанда торак бирү исемлегенә биш һәм аннан да күбрәк баласы булган күп балалы 824 гаилә теркәлгән. 2014 елда шуларның 45ен торак белән тәэмин итү планлаштырыла. Бу максатларга 2014 елда 122 млн., 2015 елда 128,1 млн. сум акча каралган.
2014 елда 100 яшь гаиләне торак белән тәэмин итү планлаштырылган.

Арендага биреләчәк торак төзелеше үсешенә килгәндә, 2014 елда ТР Президенты карамагындагы дәүләт торак фонды файдалануга 77 мең 955 кв. м. лы 20 йорт тапшырырга ниятли. Беренче чиратта, бу - «Иннополис» территориясендәге, Алабугадагы ("Алабуга" МИЗ белгечләре өчен) күп фатирлы йортлар, шулай ук Казандагы ике йорт.
2014 елда инвестицион күп катлы йорт программасы кысаларында 12 муниципаль берәмлектә гомуми мәйданы 1 млн. 17 мең кв. м. булган 10 мең 652 фатирлы 98 йорт төзү планлаштырыла.
2014 елда, 18 муниципаль берәмлектә полиция хезмәткәрләре өчен 38 административ-торак комплексы төзү планлаштырыла, шулардан 20 комплекс республика, 18 комплекс муниципаль берәмлек бюджеты хисабына төзеләчәк.

“Һәркемгә уңайлы мохит” программасы кысаларында 2014 елда 114 объектта мөмкинлеге чикләнгәннәр өчен шартлар тудырылачак.
2014 елда бу программа кысаларында 104 мәктәптә шартлар тудырылачак.

Барлык муниципаль районнарда мәктәпкәчә белем бирү учреждениеләрен төзү һәм төзекләндерү эше дә дәвам итәчәк.
“Беренче медицина-санитария ярдәме күрсәтү учреждениеләрен төзү,чираттагы һәм капиталь ремонтлау” программасы республиканың 45 муниципаль районында гамәлгә ашырылачак.
Бюджет учреждениеләре объектларын җылылык белән тәэмин итү өчен, котельныйларны ремонтлау программасы кысаларында 598 котельный ремонтланачак.
2014 елда 5559 фатирда ике контурлы пар казаннары куелачак.
2014 елда Татарстанда авыл урамнарын яктырту буенча яңа социаль мөһим программа расланды.Финанслау күләме 225 млн. сум тәшкил итәчәк.

Киңәшмә барышында, ТР Җир һәм мөлкәти мөнәсәбәтләр министрлыгы вәкиле законны бозып рәсмиләштерелгән җир участокларын муниципалитетларга кайтару эшләре турында белдерде. Республиканың 16 муниципаль берәмлегендә законны бозып рәсмиләштерелгән җир участоклары буенча җинаять эшләре кузгатылган. 242 тикшерү эше алып барыла, аларның 209ы буенча тикшерү эшләре төгәлләнгән, 64 җир участогы муниципаль милек буларак кире кайтарылган. Моннан тыш, республикада салым базасын арттыру өчен күчемсез милек объектларын инвентарьлаштыру эше алып барыла. Инвентарьлаштыру барышында 15 мең объект ачыкланган, шуларның 4 меңнән артыгы теркәлгән.