Казанның архитектура һәм шәһәр төзелеше Идарәсе эшләргә хисап тотты

2006 елда Башкарма комитетының архитектура һәм шәһәр төзелеше Идарәсе тарафыннан төрле объектларны төзүгә, төзекләндерүгә һәм капиталь төзәтү эшләренә 604 рөхсәт кәгазе бирелгән. Бу турыда Казан шәһәр Думасының шәһәр төзелеше һәм торак-коммуналь хуҗалык буенча Даими комиссиясе утырышында әйтелде.
 Депутатлар, иң беренче чиратта, Генераль планның әзерлеге торышы белән кызыксынды. План 30 Казан шәһәр Думасы сессиясенә 30 декабрьдә тәкъдим ителәчәк, дип әйтелде. Бу дата белән депутатлар килешмәгән булса да, ризалашырга мәҗбүр булды. Узган ел җирле әһәмияткә ия булган мәдәни мирас объектлары буенча фәнни-методик Шура һәм тарихи-архитектура объектларны саклау һәм тузган йортларны сүтү мәсәәләләре буенча Комиссия төзелде. Казан шәһәре башлыгы урынбасары Людмила Андреева шәһәрнең тарихи өлешендә күпкатлы йортларның калкып чыгуы, моның тарихи һәм мәдәни йөзебезне югалтуга китерүе мәсьәләсен күтәрде.
 Депутатлар сүзләренчә, шәһәрдә үз белдеге белән йортлар, объектлар төзү эше дәвам итә. 117 объектның шундый бернинди норматив-хокукый актларга туры китерелмичә салынуы беленде. Шәһәр төзелеше кагыйдәләрен бозучыларга карата 567 административ чара күрелде. Комиссия әгъзалары архитектура һәм шәһәр төзелеше Идарәсенең хисабын тулыландырырга киңәш итте.