Татарстан Республикасы Төзелеш, архитектура һәм торак-коммуналь хуҗалык министрлыгы

Торак булса, бала туа

2007 елның 13 феврале, сишәмбе

Чаллы - яшьләр шәһәре икәнлеген республикада һәркем дә белә диярлек. Бүген ТР Яшьләр эшләре, спорт һәм туризм министрлыгы коллегиясендә Чаллы мэры Илдар Халиков шәһәрдә яшьләр өчен булдырылган шартлар, яшьләр казанышлары белән таныштырды.
Чаллыдагы ярты миллион яшәүчеләрнең 230 меңе 30 яшькә кадәр яшьләр. Илдар Халиков сүзләренә караганда, Чаллыда иң күркәм бәйрәмнәрдән берсе - Яшьләр көнен билгеләп үтү, әлеге чара 40 меңгә якын яшьне үз янына җыя.
Шәһәрдәге 72 яшьләр оешма яшьләрне позитив гамәлгә тартучы төрледән-төрле акцияләр уздыра.
Яшьләрне торак белән тәэмин итүдә дәүләт ярдәмен күрсәтү программасы буенча тугыз йөздән артык яшь гаилә торак шартларын яхшырта алган. Бу юнәлеш буенча эш туктатылмас, дип ышандыра Илдар Халиков. "Торак шартлары лаеклы булу сәбәпле, туучылар саны да арта", - дип билгеләп үтте Чаллы мэры.
Наркомания, җинаятьчелек кебек җитди бәлаларга каршы торуда "Форпост" яшьләр оешмалары ярдәмгә килә. Отышлы уеннар бизнесы буенча кабул ителгән закон да җинаятьчелек проблемасын күпмедер дәрәҗәдә хәл итәргә мөмкинлек бирде, ди Илдар Халиков.
Яшьләр шәһәрендә спорт та үсеш алган. Җиңел атлетларның, Камаз-мастер командасының халыкара ярышларда җиңүләр алып кайту - шәһәрдә спортка нинди игътибар бирүе турында сөйли. "Чаңгы юлы", "Милләтләр кроссы" кебек массалы спорт чараларында Чаллы шәһәре республикада, Россиядә иң актив катнашучыларның берсе. Халык әйтмешли, сәламәт тәндә сәламәт акыл да булыр.
Чаллыда 2007 елның апрель аенда каратэ буенча Европа чемпионаты да үтәчәк, дип планлаштырыла. Ярышларга 20 илдән 500 якын спортчы катнашачак, дип фаразлана.
Гомумән алганда, Чаллыда яшьләр үсеше өчен шартлар тудырыла, алга таба да шулай барачак, дип көтелә.

БАРЛЫК ЯҢАЛЫКЛАРНЫ УКУ