Фәрит Хәнифов Балтач районында булды

Бүген Татарстан Республикасы Премьер-министры Илдар Халиков Балтач районында булды. Аны Балтач районы башлыгы Рамил Нотфуллин озата йөрде.

Илдар Халиков беренче объект буларак Балтач сөт-май комбинатында булды. Монда ул комбинатның эше, хезмәткәрләрнең эш шартлары белән танышты, шулай ук комбинатта җитештерелә торган продукция төрләре, аларның сәүдә базарында көндәшлеккә сәләтлелеге турында кызыксынды, чит илдән керә торган товарларны үзебезнекенә алыштыруның мөһимлеген ассызыклады.

Алга таба Илдар Халиков район үзәк хастаханәсендә булып, пациентларны кабул итү, табибларның эш шартлары белән танышты. Ул хастаханәдә “Уңайлы мохит” программасы кысаларында башкарылган эшләрнең сыйфатын уңай бәяләде.
ТР Премьер-министры ашыгыч ярдәм, поликлиника һәм станционар дәвалану бүлекләрен карады. Баш табиб Газинур Дәүлиев дәүләт тарафыннан бирелгән ярдәм турында, район халкына медицина хезмәте күрсәтүдә хәл итәсе проблемалар хакында хәбәр итте.

Премьер-министр шулай ук халыкның яшәү шартларын яхшырту буенча социаль программаларның үтәлеше белән дә танышты. Авария хәлендәге тораклардан Кави Нәҗми урамындагы яңа өйләргә күчкән Бибиниса Абдуллина белән Рузилә Хәмидуллина фатирларында булды.

Аннары Илдар Халиков Балтач муниципаль район советының 34нче утырышында катнашты (район Мәдәният йортында).
Утырыш башланыр алдыннан кунаклар район предприятиеләренең авыл хуҗалыгы һәм сәнәгать продукциясе күргәзмәсен карадылар.

Утырышта ТР Дәүләт Советы рәисе урынбасары Римма Ратникова, ТР Дәүләт Советы депутаты Вәгыйз Минһаҗев, ТР Иминлек советы секретаре Айрат Шәфигуллин, ТР Төзелеш,архитектура һәм торак-коммуналь хуҗалыгы министрның беренче урынбасары Фәрит Хәнифов, республиканың башка министрлыклары һәм ведомстволары вәкилләре катнашты.

Фоторепортаж