Ирек Фәйзуллин "2030 елга кадәр ТР Социаль-икътисади үсеш стратегиясен раслау турында"гы закон проектын һәм 2030 елга кадәр Татарстан Республикасының социаль-икътисади үсеш фаразын карау буенча ТР Министрлар Кабинеты утырышында катнашты

Бүген Татарстан Республикасы Премьер-министры Илдар Халиков Татарстан Республикасының "2030 елга кадәр Татарстан Республикасының Социаль-икътисади үсеш стратегиясен раслау турында"гы закон проектын һәм 2030 елга кадәр Татарстан Республикасының социаль-икътисади үсеш фаразын карау буенча ТР Министрлар Кабинеты утырышын уздырды. Шулай ук анда ТР Премьер-министрының беренче урынбасары Алексей Песошин, ТР Дәүләт Советы рәисе урынбасары Юрий Камалтынов, ТР Төзелеш,архитектура һәм торак-коммуналь хуҗалык министры Ирек Фәйзуллин, республика министрлыклары һәм ведомстволары вәкилләре катнашты.
Утырышны ачып, Илдар Халиков бүген республиканың барлык муниципалитетларында ТРның социаль-икътисади үсеш стратегиясе турында фикер алышулар узды, дип билгеләде. ТР Премьер-министры сүзләренчә, стратегиягә әзерлек эшләре "Леонтьев үзәге" белгечләре белән бергә ике ел дәвамында алып барыла.
"Бу эш Татарстан өчен һәм Россия Федерациясе өчен дә икътисади шартлар әйбәт вакытта башланды. Бүген бу документның актуальлеге тагын да артты. Ул төп максатлар һәм бурычларны системалаштыру һәм ныгытуның мөһим булуын күрсәтә", - дип ассызыклады Илдар Халиков.

Рөстәм Миңнеханов тарафыннан чын эш документын булдыру бурычы куелган иде, дип өстәде ТР Премьер-министры. Бу эшкә муниципаль хакимиятләр генә түгел, ә бәлки җәмәгатьчелек, шулай ук республиканың барлык хакимият органнары җәлеп ителде. Стратегияне кабул иткәнче, бу документның нигезе булачак социаль-икътисади үсеш фаразын расларга кирәк, дип белдерде Илдар Халиков.

Илдар Халиков белдергәнчә, "Татарстан-2030" стратегиясен гамәлгә ашыру барышында 2030 елга тулай төбәк продукты үсеше, сәнәгать җитештерүе һәм авыл хуҗалыгы продукциясен җитештерү күләме 1,8 тапкыр, ваклап сату әйләнеше 1,9, төп капиталга инвестицияләр 1,7 тапкыр артыр дип фаразлана. Социаль үсеш күрсәткечләренә килгәндә, 2030 елга республика халкы 300 мең кешегә артачак, ә гомер озынлыгы 75 яшьне тәшкил итәчәк. Эшсезлек дәрәҗәсе 3,7%тан артмаска тиеш.

Алга таба Татарстанның икътисад министры Артем Здунов доклад ясады. Ул “Татарстан-2030” стратегиясе һәм 2030 елга кадәр Татарстан Республикасының социаль-икътисади үсеш фаразы турында сөйләде.