Минзәлә шәһәрендә Җиңү паркы реконструкцияләнә

Җиңү паркында башкарылган эшләр турында безгә рай­он башкарма комитетының төзелеш, архитектура һәм ТКХ бүлеге начальнигы Евгений Ба­сков түбәндәгеләрне сөйләде:

– Биредә 11 млн сумлык эшләр башкару күздә то­тыла. Ел башында паркны реконструкцияләүгә 270 мең сумлык проект-смета докумен­тациясе эшләнде. Бүгенге көндә паркта 8,8 млн сумлык эшләр башкарылды: Бөек Ватан сугышының кайтавазы булган сугышчан кораллар урнаш­тырылды, үзәк аллеяның брусчаткалары, Геройлар хөрмәтенә ку­елган бюстларның подставкалары яңартылды. Җиңүче Сугышчы постаментына һәм монументына реконструкция ясалды.

Шушы араларда парк периметры буенча велосипед һәм роли­клы конькида йөрү өчен юл да асфальтланды. Мәйданчыкны юл билгеләре һәм автомобильләр белән җиһазлагач, балаларга юл иминлеге билгеләре өйрәнү өчен шартлар тудырылачак. Паркта яктырткычлар урнаштыру өчен әзерлек эшләре башланды.

Паркның бер өлешендә (1000 кв.м) мини футбол өчен спорт мәйданчыгы төзелде, монда сферастройлыларның өлеше кер­де, субподрядчы оешма – «Бизнес флорспорт» эшчеләре ясалма үлән җәйде. Шулай ук тренажерлар, атынгычлар, башка бик күп төрле уен һәм спорт җайланмалары, кече архитектура формала­ры урнаштырылды.

Алга таба паркны яшелләндерү, агач һәм куаклар өстәп утыр­ту, автошәһәрчек ясау, беседкаларны монтажлау кебек эшләрне төгәллисе бар.

Җиңү паркы минзәләлеләр өчен ял, аралашу, үсеп килүче буын­да патриотик хисләр, сәламәт яшәү рәвешен тәрбияләү урынына әверелер дип өметләнәм. Ул шулай ук Бөек Ватан сугышы турын­да якты истәлек булыр.

Татарстанда әлеге программа кысаларында 143 заманча парк һәм сквер хасил булачак (шуларның 75е яңабаштан төзелә, 68ендә капиталь ремонт ясала).

2015 елда ТР бюджетыннан “Парклар һәм скверлар” программасын гомуми финанслау күләме 1 млрд сум тәшкил итә.