Татарстан Республикасында күршеләр көне билгеләп үтелде

27 майда Татарстан Республикасында “Күршеләр көне” дип аталган бәйрәм чарасы үтте. Чара кысаларында республика районнары кызыклы уеннар, бәйгеләр, биюләр уздырганнар. 

Аның максаты – бер-берсе белән күрше булып яшәүче кешеләрне берләштерү, яшәүчеләр иминлеге һәм уңайлылыгы хакына төрле проектларны уртак тормышка ашыру өчен җәмгыятьтә торган саен үсә барган үз-үзеңә бикләнү, күршеләрдән читләшүгә каршы тору. Россиянең күп төбәкләрендә ел саен уздырылучы “Күршеләр көне” күпләр өчен чын шатлык алып килүче һәм ачыш ясаучы чарага әверелә бара. Бу – чагыштырмача яшь бәйрәм, шуңа да карамастан, үтә тиз арада үзенә бик күп игътибарны җәлеп итәргә өлгерде: бәйрәм итүнең бик күп өлгеләре барлыкка килде, кешеләр бер-берсе белән активрак аралаша һәм бәйрәм елдан-ел зуррак популярлык казана башлады. Күршеләр бәйрәменә кешеләр үз йортларында яки мәхәлләләрендә яшәүчеләрне генә түгел, ә алар территориясендә эшләүчеләрне дәшүне дә хуп күрделәр, аларга мәхәлләдәге матур эшләре өчен рәхмәт белдерделәр, монда яшәүчеләр һәм йортлар иминлеге, уңайлылыгы хакына аларны хезмәттәшлеккә актив җәлеп итә, чакыра башладылар.