2024 елда Татарстанда су белән тәэмин итү һәм ташландык суларны агызуда 36 инвестицион программаны гамәлгә ашыру планлаштырылган
2023 елның гыйнвар-октябрь айларында коммуналь инфраструктура объектларын үстерү, модернизацияләү һәм реконструкцияләү буенча инвестиция программалары чараларын үтәү 4 млрд.сумнан артык тәшкил итте. Бу хакта Татарстан Республикасы Хөкүмәте Йортында узган брифингта Татарстан Республикасы Төзелеш, архитектура һәм торак-коммуналь хуҗалык министрының беренче урынбасары Алексей Фролов хәбәр итте.
Алексей Фролов журналистларга 2023 елга су белән тәэмин итүдә 17 инвестиция программасы һәм коммуналь комплексның 14 оешмасы өчен су чыгару өлкәсендә 16 инвестиция программасы расланганын хәбәр итте. Финанслауның гомуми планы 7 млрд.сумга якын тәшкил итә. «2022 ел белән чагыштырганда программалар саны 11гә артты, финанслауның планлы күләме 2 млрд.сумнан артып китте», - дип төгәлләде сүзен министрның беренче урынбасары.
Республикада инвестицион программалар коммуналь хуҗалыкка өстәмә инвестицияләр җәлеп итү, торак фондын төзекләндерү дәрәҗәсен арттыру, коммуналь инфраструктураның тузуын киметү максатларында гамәлгә ашырыла.
2024 елга су белән тәэмин итү һәм су чыгару өлкәсендә 36 инвестиция программасы расланган, аларны финанслау планы 6,5 млрд сумнан артык тәшкил итәчәк.
Моннан тыш, ел саен республика һәм федераль программалар кысаларында коммуналь инфраструктураны модернизацияләүгә акча бүлеп бирелә. Аларның иң зурысы - халыкны эчәр су белән тәэмин итү буенча республика программасы. Агымдагы елда программа кысаларында 211,15 км суүткәргеч челтәре төзелеше һәм реконструкциясе башкарылган, 38 су күтәрү манарасы урнаштырылган, 1 млрд сумнан артык гомуми суммага 16 артезиан скважинасы бырауланган.
2024 елда коммуналь хезмәтләргә тарифларны үзгәртүгә һәм җайга салынуы оешмалар тарафыннан инвестицион программаларны үтәүгә багышланган брифингта ТР Тарифлар буенча дәүләт комитеты рәисе Александр Груничев, ТР Хезмәт, халыкны эш белән тәэмин итү һәм социаль яклау министры урынбасары Наталья Бутаева катнашты.
Александр Груничев хәбәр иткәнчә, Россиянең барлык төбәкләрендә коммуналь хезмәтләргә тарифларны планлы индексацияләү 2024 елның 1 июленнән булачак. «Федераль закон таләпләренә туры китереп, ТР тарифлар буенча дәүләт комитеты 2024 елга тарифларны быелның 20 декабренә кадәр расларга тиеш», — диде ул. Тариф комитеты башлыгы билгеләп үткәнчә, коммуналь хезмәтләр өчен гражданнарның түләү индексы үсеше буенча республика буенча уртача 10,8% күләмендә РФ Хөкүмәте карары белән расланган, Аерым муниципаль берәмлекләр буенча файдаланырга мөмкин булган максималь рөхсәт ителгән күренеш 4,9% күләмендә билгеләнгән.