Республикада 2023 елга торак тапшыру планы 8,6 процентка арттырып үтәлгән

Торак төзелеше программасы буенча 2023 елга билгеләнгән план 8,6% ка арттырып үтәлгән. Бүген бу хакта Татарстан Республикасы Хөкүмәте Йортында узган киңәшмәдә ТР Төзелеш, архитектура һәм торак-коммуналь хуҗалык министры Марат Айзатуллин хәбәр итте.

Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов үткәрде.

Шул исәптән 1 млн 702 мең кв.м шәхси торак төзелешенә, 1 млн 503 мең кв. м күп фатирлы инвестицион торакка, 161 мең кв. м социаль ипотека буенча йортларга туры килә.

Аерым категория гражданнарны торак белән тәэмин итү программалары турында сөйләгәндә, Марат Айзатуллин «ятим балалар» категориясендә кергән 762 алучы белән  контрактлар төзү этабы тәмамлануын хәбәр итте. 564 бина буенча республикада милек хокукын теркәү алып барыла, 198 буенча аренда килешүләре төзелгән, фатирлар ятим балаларга тапшырылган.

81 кешедән торган яшь гаиләләрне торак белән тәэмин итү программасы буенча субсидия акчаларын 38 муниципаль берәмлектә яшәүче барлык гаиләләр кулланган.

5 һәм аннан да күбрәк баласы булган күп балалы гаиләләргә рәсмиләштерелгән 34 сертификатның 32се гамәлгә ашырылган. Калган гаиләләр фатирлар сайлый.

Мәҗбүри күченүчеләр, чернобыльлеләр һәм Ерак Төньяктан күченүчеләр арасыннан гражданнар категориясендә 2023 елда бирелергә тиешле барлык 6 сертификат рәсмиләштерелгән.