ТР Төзелеш министрлыгында агымдагы елда беренче Иҗтимагый совет утырышы узды
Бүген республика Төзелеш министрлыгында Иҗтимагый совет утырышы кысаларында 2023 елда Татарстан Республикасы дәүләт программаларын гамәлгә ашыру йомгаклары, шулай ук 2024 елга бурычлар турында фикер алыштылар. Утырышны Иҗтимагый совет рәисе Ринат Абдуллин үткәрде.
ТР Төзелеш, архитектура һәм торак-коммуналь хуҗалык министры урынбасары Илнур Нурмөхәммәтов үз чыгышында ТР Төзелеш, архитектура һәм торак-коммуналь хуҗалык министрлыгының заказчы-координаторы булган Татарстан Республикасының ике дәүләт программасы турында сөйләде.
Узган ел йомгаклары буенча «Татарстан Республикасы халкын сыйфатлы торак һәм торак-коммуналь хуҗалык хезмәтләре белән тәэмин итү» дәүләт программасы кысаларында 3,437 млн.кв. м. торак файдалануга тапшырылган. 80 яшь гаилә торак алган һәм торак шартларын яхшырткан. Торак урыннары 762 ятим балага бирелгән, торак шартларын яхшыртуга мохтаҗ 25 күп балалы гаилә торак белән тәэмин ителгән. Ел йомгаклары буенча торак шартларын яхшырткан гаиләләр саны 119,5 мең тәшкил итте.
Коммуналь инфраструктураның тузганлыгы 45,8% ка кадәр кимегән, төзекләндерүнең барлык төрләре белән тәэмин ителгән Торак фонды мәйданының өлеше Татарстан Республикасы торак фондының гомуми мәйданында 89,6% ка кадәр арткан.
«Татарстан Республикасы территориясендә заманча шәһәр мохитен формалаштыру» дәүләт программасын тормышка ашыру нәтиҗәсендә, 2023 елда Татарстан Республикасының бер кешесенә туры килгән төзекләндерелгән иҗтимагый территорияләр мәйданы 4,487 кв.метрга кадәр артты, кече шәһәрләрдә һәм тарихи торак пунктларда уңайлы шәһәр мохитен булдыруның иң яхшы проектлары Бөтенроссия конкурсында җиңүчеләрнең проектлары гамәлгә ашырылды.
Аннары Иҗтимагый совет әгъзалары ТР Төзелеш министрлыгында коррупциянең торышы һәм коррупциягә каршы сәясәтне гамәлгә ашыру турында доклад тыңладылар.