Рөстәм Миңнеханов Чистайның тарихи үзәгендә берничә объектта булды
Рөстәм Миңнеханов Чистай шәһәренең тарихи үзәгендә берничә объектта булды. Аны Рәиснең ярдәмчесе Олеся Балтусова, ТР мәдәният министры Ирада Әюпова, ТР Төзелеш, архитектура һәм ТКХ министры Марат Айзатуллин, ТР Мәдәни мирас объектларын саклау комитеты рәисе Иван Гущин, ТР Туризм буенча Дәүләт комитеты рәисе Сергей Иванов, Чистай районы башлыгы Дмитрий Иванов озатып йөрде.
Мәсәлән, Рөстәм Миңнеханов яңа Пристань төзелеше барышы белән танышты. Бүгенге көндә пассажирлар павильоны бинасы әзер, янәшәдәге территорияне төзекләндерү һәм причал стенасын төзү буенча эшләр дәвам итә. Яңа объект шәһәрнең туристлар җәлеп итүчәнлегенә уңай йогынты ясар дип көтелә. Проектны быел тәмамлау планлаштырыла.
Рөстәм Миңнеханов навигация чоры тәмамланганнан соң павильонны яшьләр белән эшләү өчен кулланырга тәкъдим итте: биредә яшүсмерләр клубы урнаштырырга, балалар өчен төрле чаралар үткәрергә.
Киләсе объект Маркин урамындагы булачак кунак йорты мәйданчыгы. Проект 2024 елның 21 маенда тарихи торак пунктларда шәһәр төзелеше эшчәнлеге мәсьәләләре буенча ведомствоара комиссия утырышында тәкъдим ителде. Карау-тикшерү нәтиҗәләре буенча кунакханәнең архитектура чишелешен эшләп бетерергә тәкъдим ителә. Бүген Рөстәм Миңнехановка фасадны бизәүнең берничә яңа вариантын тәкъдим иттеләр, аларның берсе нигез итеп кабул ителде.
Аннары республика Рәисе төбәк (республика) әһәмиятендәге мәдәни мирас объекты булган Александровский Төнге йортын карады. Чистай шәһәренең тарихи торак пунктын тотрыклы үстерү концепциясенә ярашлы рәвештә, бинаны туристларны мәгълүмати озата бару үзәге итеп кулланырга киңәш ителә. Шулай ук Рөстәм Миңнеханов янәшәдә туристик автобуслар өчен парковка оештырырга тәкъдим итте.
Сәүдәгәр Челышев биналары комплексында ИТ өлкәсендә яшь белгечләр әзерләү үзәге һәм җирле һөнәрчеләр өчен остаханәләр ачу планлаштырыла. Бүгенге көндә биналар буш тора. Рөстәм Миңнеханов биналарны тикшерү һәм алга таба ремонтлау буенча карар кабул итүне йөкләде.
Аннары ул 1847 елда сәүдәгәр Мешкичевның торак йорты буларак төзелгән җирле (муниципаль) әһәмияттәге мәдәни мирас объектында була. Хәзерге вакытта бинага Чистайның архитектура һәм шәһәр төзелеше хезмәтләре, конторалар һәм торак фатирлар урнашкан. Объектны саклап калу максатыннан район җитәкчелеге тарафыннан түбә ремонтлау һәм баскычның беренче катындагы япмаларны ныгыту буенча эшләр башкарылган. Бина буенча тикшерү үткәрү һәм проектны актуальләштерү турында йөкләмәләр бирелгән.
Рөстәм Миңнеханов үз чиратында шәһәр җитәкчелеген мәдәният һәм тарих һәйкәлләренә сак карарга чакырды. «Чистай - бай тарихлы уникаль шәһәр. Монда бик күп үзенчәлекле архитектура сакланып калган. Сезнең зур туристик потенциалыгыз бар. Аны дөрес тормышка ашырырга кирәк. Шуңа күрә объектларны реконструкцияләүгә һәм тарихи үзәк территориясендә яңа төзелешкә игътибар белән карарга кирәк», - дип ассызыклады Татарстан Рәисе.