Айдар Әхмәтҗанов: күп проектлар төзелешкә рөхсәт бирү таләпләренә туры килми
Бүген «Казан-Экспо» да «СТРОЙКА» күргәзмәсе кысаларында панель сессиясендә төзелешкә рөхсәт алуның актуаль мәсьәләләре турында фикер алыштылар. ТР Төзелеш, архитектура һәм торак-коммуналь хуҗалык министрлыгы департаменты башлыгы Айдар Әхмәтҗанов ТР Төзелеш, архитектура һәм торак-коммуналь хуҗалык министрлыгына килгән төп үзгәрешләр һәм документлар сыйфаты турында сөйләде.
Исегезгә төшерәбез, агымдагы елдан Татарстан Төзелеш министрлыгы җирле үзидарә органнарыннан шәһәр төзелеше эшчәнлеге өлкәсендә тапшырылган 12 вәкаләтне гамәлгә ашыра, шуларның 6сы хәзерге вакытта административ регламентлар расланган дәүләт хезмәтләре булып тора.
«Вәкаләтләрне республика дәрәҗәсенә тапшыру республика территориясендә территориаль планлаштыру, шәһәр төзелеше зоналаштыру һәм төзелешне гамәлгә ашырганда бердәм сәясәтне тормышка ашырырга, шулай ук шәһәр төзелеше документларын вакытында һәм сыйфатлы актуальләштерергә мөмкинлек бирергә тиеш», - диде Айдар Әхмәтҗанов.
Аның сүзләренчә, 8 июльгә ТР Төзелеш министрлыгына дәүләт хезмәтләре күрсәтүгә 11 792 гариза килгән, шуларның 7 000 нән артыгы каралган. Аларның төп массасын ГПЗУ бирү буенча хезмәт тәшкил итә һәм аларның саны 9 095 мөрәҗәгатькә җиткән, төзелешкә рөхсәт бирү буенча 783, бу килгән гаризаларның гомуми массасының 6,6 процентын тәшкил итә.
Ул билгеләп үткәнчә, төзелешкә рөхсәт биргәндә җибәрелә торган проектларның күпчелеге җир кишәрлегенең шәһәр төзелеше планы таләпләренә туры килми, инженерлык эзләнүләре нәтиҗәләре юк, капиталь төзелеш объектларын инженер-техник тәэмин итү челтәрләренә тоташтыруның техник шартлары юк. Шунысын да билгеләп үтәргә кирәк, каралган проект документларының зур проценты әзерлекнең түбән сыйфатына ия, бу үз чиратында уңай карар кабул итәргә мөмкинлек бирми.
«Без беренче чиратта төзелеш барышының иминлеген, бу капиталь төзелеш объектын эксплуатацияләүнең куркынычсызлыгын күзәтергә тиешбез. Янгын куркынычсызлыгы төгәл үтәлергә тиеш. Без моны рөхсәт документларын формалаштыру этабында карарга тиеш, шуңа күрә төзелешкә рөхсәт бирү өчен килгән документларны тикшерүгә бик җентекләп карыйбыз», - диде А.Әхмәтҗанов.
Исегезгә төшерәбез, «Стройка» күргәзмәсе Казанда 10-12 июльдә «КазаньЭкспо» мәйданчыгында уза.