Республикада төзелә торган мәктәпләрнең әзерлеге 95 проценттан артып китә

Социаль объектлар төзелеше буенча актуаль мәгълүматларны ТР Хөкүмәте Йортында узган атналык киңәшмәдә ТР Төзелеш, архитектура һәм торак-коммуналь хуҗалык министры Марат Айзатуллин җиткерде.

Мәгариф өлкәсендә 21 объект буенча эшләр алып барыла. 11 мәктәп һәм янкорманың әзерлеге бүгенгә 95% тәшкил итә. Агымдагы атнада подрядчылар 3 объектта эшне төгәлләделәр - Казандагы «Весна» торак комплексында һәм Лаеш районының Усады авылында 1501 урынга исәпләнгән ике мәктәп, шулай ук Казандагы Ватан урамында 1 224 урынга исәпләнгән мәктәп. Әлеге объектлар «Мәгариф» милли проектына керә.

10 балалар бакчасын төзү эшләре 79% ка тәмамланган. Агымдагы атнада Казандагы «Салават күпере-2» торак комплексында 260 урынга исәпләнгән бер объект төгәлләнде.

Сәламәтлек саклау тармагында 53 объект төзелә. Фельдшер-акушерлык пунктларын төзү эшләре 83% ка үтәлгән. Узган 2 атнада 6 муниципалитетта 7 объектта эшләр төгәлләнгән. Башка медицина учреждениеләре буенча эшләр 52% ка башкарылган.

4 футбол манежы төзелеше 46%, 15 универсаль спорт мәйданчыгы – 73% тәшкил итә. Узган ике атнада 5 объектта (Саба, Кукмара һәм Биектау районнарында) эшләр төгәлләнде.

«Экология» тармагы объектлары буенча биологик чистарту корылмаларын реконструкцияләү буенча 89% ка эшләр башкарылган; ләм кырларын рекультивацияләү буенча 68% ка; Саба районының Шәмәрдән авылында нефтьле пычранулар аркасында бозылган җирләрне рекультивацияләү буенча 82,5% ка эшләр башкарылган.

Коммуналь инфраструктураны модернизацияләү федераль программасы буенча төзелеш-монтаж эшләре 79% тәшкил итә. Хәзерге вакытта подрядчылар 32 объектта эшли.  Соңгы ике атнада Кама Тамагы районында бер объект һәм Казанда ике объект буенча эшләр төгәлләнгән.