Татарстан җыелма командасы Екатеринбургта төзелеш чемпионатында 10 медаль яулады
2024 елның 1 октябреннән 4 октябренә кадәр Екатеринбург шәһәрендә 25 номинация буенча IV Халыкара төзелеш чемпионаты узды. Чара Халыкара төзелеш атналыгы кысаларында узды, аны «Россия – мөмкинлекләр иле» АНО һәм Свердловск өлкәсе хөкүмәте оештырды.
Чемпионатта катнашу өчен Татарстан Республикасыннан катнашучылар төркеме, сайлап алу этабы нәтиҗәләрен исәпкә алып, ТР Мәгариф һәм фән министрлыгы тарафыннан «Һөнәри компетенцияләрне үстерү үзәге» АНО белән берлектә расланды.
Җыелма команда составына 10 номинация буенча 11 мәгариф оешмасыннан 8 студент һәм 13 мәктәп укучысы керде. Төп лигада 34 кешедән торган «Алабуга» МИЗ белгечләре катнашты.
Ел саен үткәрелә торган чара төрле илләрдән профессиональ белгечләрне берләштерә. Катнашучылар үзләренең осталыкларын күрсәтәләр, хезмәттәшләре белән тәҗрибә уртаклашалар һәм алдынгы технологияләрне үзләштерәләр.
Чемпионатның йомгаклау нәтиҗәләре буенча Татарстан Республикасы җыелма командасы вәкилләре 8 призлы урын яулады һәм гомуми зачетта җиде номинация буенча 10 медаль яулады. Шулардан - 4 алтын, 3 көмеш һәм 3 бронза медаль.
Студентлар лигасының «Кул белән эретеп ябыштыручы» номинациясендә 1 урынны Казан политехника көллияте студенты Әмир Хәлимбаев алды, «Икенчел коммутация электромонтажы» номинациясендә Казан энергетика көллияте студенты Булат Сафиуллин җиңде.
«Архитектура-төзелеш өлешен проектлау» номинациясендә беренче урынны Казан дәүләт архитектура-төзелеш университеты студенты Ангелина Долганова, «Электротехника өлешен проектлау» номинациясендә Казан дәүләт энергетика университеты студенты Ефим Широбоков яулады.
Казан дәүләт энергетика университеты студенты Азамат Өмурзаков «Электротехника өлешен проектлау» номинациясендә 2 нче урынны алды. «Технологик өлешне проектлау» номинациясендә КДАТУ студенты Алия Бикмуллина 3 нче урын алды.
«Төзелә торган һәм эксплуатацияләнә торган объектларның нәтиҗәлелеге» команда номинациясендә КФУның «Н.И. Лобачевский исемендәге лицей» урта мәктәбе укучылары Даниил Кольцов һәм Григорий Софьин 2 урынны яуладылар.
Төп лиганың «Инженер-геодезист» команда номинациясендә 3 нче урынны «Алабуга политех»тан Альберт Дюртеев һәм Раил Хафизов лаек булды.
Киләсе халыкара төзелеш чемпионаты 2025 елда Түбән Новгородта узачак.