Дмитрий Чернышенко белән Рөстәм Миңнеханов Казанда футболны үстерү үзәге төзелеше барышын бәяләделәр

Россия Хөкүмәте Рәисе урынбасары Дмитрий Чернышенко Казанга эш сәфәре кысаларында футболны үстерү үзәгенең төзелеш мәйданчыгында булды. Татарстан Республикасы Рәисе Рөстәм Миңнеханов белән берлектә вице-премьер объект төзелеше барышын бәяләде.

Яңа спорт үзәге балалар командалары өчен дә, профессиональ спортчылар өчен дә футбол буенча тренировкалар процессының тулы циклын формалаштыру өчен оештырыла.

Киләчәктә территориядә тагын өч кыр төзү планлаштырыла: икесе – демонтажланган стадион урынында һәм берсе – ябык манежда.

Моннан тыш, спортчы кызлар өчен хатын-кызлар корпусы төзелеше башланды. 1 нче катта чишенү бүлмәләре, торгызу зонасы, судьялар бүлмәләре, медицина кабинетлары, допинг-контроль зонасы, матбугат конференцияләре һәм ММЧ эшләре өчен заллар урнашачак. 2 нче катта торак бүлмәләр урнаштырылачак – барлыгы 76 кешегә исәпләнгән 28 номер.

Шулай ук 2027 елда яңа универсаль спорт комплексын тапшыру планлаштырыла. Объект тулы спорт әзерлеге, яшәү һәм футболчыларны тернәкләндерү өчен каралган. Проект буенча 67 кешегә исәпләнгән 40 торак номер планлаштырылган.

Базаның иске һәм яңа корпуслары, шулай ук хатын-кызлар корпусы җир өсте галереялары-кичүләр белән тоташтырылачак, тулы кыйммәтле заманча спорт комплексы барлыкка киләчәк.

Дмитрий Чернышенко билгеләп үткәнчә, Татарстан Республикасында спорт өлкәсе динамик рәвештә үсә. Бу Президент Владимир Путин куйган илкүләм максатка ирешүгә хезмәт итә – гражданнарның сәламәтлеге ныгый. «Хөкүмәт рәисе Михаил Мишустин кушуы буенча футболны үстерү үзәген карадык һәм эшнең баруын тикшердек, «физик культура һәм спортны үстерү» дәүләт программасы буенча финанслау тәэмин ителгән», – дип ассызыклады вице-премьер.

Объектны карауда ТР Төзелеш, архитектура һәм торак-коммуналь хуҗалык министры Марат Айзатуллин да катнашты.