Төбәк иҗтимагый кабул итү бүлмәсендә торак-коммуналь хуҗалык өлкәсендәге актуаль мәсьәләләр турында фикер алыштылар
Төбәк иҗтимагый кабул итү бүлмәсендә торак-коммуналь хуҗалык мәсьәләләренә багышланган тематик көн узды. Торак-коммуналь хуҗалык өлкәсендәге актуаль мәсьәләләр буенча вебинарда ТР Төзелеш, архитектура һәм ТКХ министры урынбасары Мәҗит Салихов катнашты.
Шулай ук вебинар спикерлары булып парламентның торак сәясәте һәм инфраструктура үсеше комитеты рәисе Андрей Егоров һәм Татарстанның Дәүләт торак инспекциясе башлыгы Александр Тыгин чыгыш ясады.
Мәҗит Салихов җылылык белән тәэмин итү өлкәсендә инвестиция программаларын үстерү турында сөйләде.
«2024 елда Татарстан территориясендә 15 инвестицион программа гамәлгә ашырыла. Моннан тыш, без инфраструктураның тузуы һәм булмавы проблемаларын хәл итү өстендә актив эшлибез, бу кайбер районнар өчен аеруча актуаль. Шулай ук республикада су белән тәэмин итү буенча гомуми бәясе 6 миллиард 426 миллион сумлык 35 программа гамәлгә ашырыла. 2008 елдан бирле эшләп килүче күп фатирлы йортларга капиталь ремонт ясау программасы нәтиҗәсендә без 11 863 йортны яңарта алдык», - дип төгәлләштерде ул.
Дәүләт торак инспекциясе башлыгы Александр Тыгин төбәкнең җылыту сезонына әзерлеген билгеләп үтте.
«Хәзерге вакытта республиканың барлык 18 000 йорты кышка әзер. Аларның кайберләрендә, 70кә якын объектта, ремонт эшләре төгәлләнеп килә», - дип уртаклашты ул.