Татарстанлылар Россиянең яшьләр башкаласын сайлый
Татарстанлылар 20 декабрьгә кадәр Россиянең Яшьләр башкаласы – 2025 өчен тавыш бирә алалар. Идел буе федераль округы шәһәрләренең берсе – Пермь, әлеге исем алуга һәм яшьләр проектларын гамәлгә ашыруда, грант конкурсларында һәм федераль дәрәҗәдәге чараларда ярдәм итүгә дәгъва кыла. Бөтен ил буенча яшьләрнең үз-үзләрен тормышка ашыру мөмкинлекләрен булдыру «Мәгариф» илкүләм проекты максатларына туры килә. Тавыш бирүгә йомгак 2024 елның 22 декабрендә «Яшьләр вакыты» еллык премиясендә ясалачак.
«Традиция буенча ел ахырында халык тавыш бирү юлы белән Россиянең Яшьләр башкаласын сайлыйлар. Финалистлар исемлегенә Пермь шәһәре керде. Биредә 285 меңнән артык яшь кеше яши, аларга 2025 елгы яшьләр башкаласы булу өчен безнең ярдәм кирәк. Тавыш бирүдә катнашу Дәүләт хезмәтләре порталында оештырылган: үз хисап язмагызга кереп, сораштыру ачарга, аннары финалга чыккан шәһәрләр исемлегеннән Пермь өчен тавыш бирергә һәм "җибәрергә" төймәсенә басарга кирәк. Экранда тавыш исәпкә алынган дигән хәбәр барлыкка киләчәк. Җиңгән шәһәр бөтен илдән яшьләрне җәлеп итү урыны булачак һәм нәкъ менә анда Росмолодеждан төрле федераль проектлар гамәлгә ашырылачак. Татарстан яшьләрен Пермь өчен тавыш бирергә чакырам, безнең Идел буе федераль округы киләсе елга кызыклы һәм якты яңа проектларны җәлеп итү урыны булсын», – дип билгеләде Татарстан Яшьләр эшләре министры Ринат Садыйков.
Финалда катнашу хокукы өчен Россиянең 17 шәһәре көрәште. Сайлап алу шәһәрдә яшьләр өчен булган инфраструктура, субъектлар территориясендә гамәлгә ашырыла торган проектлар һәм программалар, шулай ук яшьләр инициативаларына ярдәм итү турындагы мәгълүматларны исәпкә алып үткәрелде.
Конкурста җиңүче, федераль грант конкурсларын да кертеп, росмолодежь экосистемасының әһәмиятле проектларын гамәлгә ашыру, алга этәрү медиастратегиясен эшләү һәм яшьләр инициативаларын гамәлгә ашыру өчен эксперт ярдәме алу хокукына ия булачак.