Лаеш районының Комлы Кавал авылында 220 урынлык «Умка» яңа балалар бакчасы ачылды
Лаеш районының Комлы Кавал авылында 220 урынлык «Умка» балалар бакчасын ачу тантанасы булды. Чарада Татарстан Рәисе Рөстәм Миңнеханов белән Лаеш районы башлыгы Илдус Зарипов катнашты.
«Мондый күләмле проектны гамәлгә ашыру команданың бердәм эше нәтиҗәсендә мөмкин булды. «Умка» сабыйларыбыз өчен икенче йорт булыр дип ышанам», – дип ассызыклады Илдус Зарипов.
«Символик атама, чөнки мәктәпкәчә белем – балаларыбызны тәрбияләүнең беренче һәм бик мөһим баскычы. Биредә аларны үстерү һәм тәрбияләү өчен барлык шартлар да тудырылган, ә янәшәдә урнашкан лицей белән бергә «Умка» бакчасы җирле халык өчен белем бирү кластерының бер өлешенә әверелгән. Мондый юнәлештәге эшне без бөтен республика буенча дәвам итәчәкбез», – дип билгеләде Рөстәм Миңнеханов.
Мәйданы 4,5 мең квадрат метрдан артык булган өч катлы яңа бакча 1,5 яшьтән өлкәнрәк балалар өчен 12 төркемне үз эченә ала. «Умка»ның үзенчәлеге – катнаш форматта: монда сөйләме нык аксаган балалар өчен ике махсус төркем эшләячәк.
Беренче катта ясле категориясендәге балалар өчен 5 төркем (1,5-3 яшь), медицина кабинеты һәм азык-төлек блогы урнашкан. Икенче катта өч яшьтән өлкәнрәк балалар өчен 6 төркем, Музыка һәм физкультура заллары, шулай ук логиканы үстерү дәресләре өчен сенсор бүлмә бар. Яңа балалар бакчасы ачылу «Гаилә» илкүләм проектының максатларын һәм бурычларын хуплый.