Төзелеш министрлыгына Приморье крае делегациясе килде
ТР Төзелеш, архитектура һәм ТКХ Министрлыгында Приморье крае делегациясе белән эшлекле очрашу булды. Катнашучылар Татарстанда каты коммуналь калдыклар белән эшләүне оештыру мәсьәләләрен карадылар.
Министрның беренче урынбасары Дамир Шәйдуллин республикада каты коммуналь калдыклар белән эш итү өлкәсендәге эшне оештыру турында сөйләде. Аерым алганда, Д.Шәйдуллин билгеләп үткәнчә, 2024 ел нәтиҗәләре буенча Татарстанда «Экология» илкүләм проектына кергән «Каты коммуналь калдыклар белән эш итүнең комплекслы системасы» федераль программасының барлык план күрсәткечләре үтәлгән. Агымдагы елда төп максаты әйләнә-тирә мохитне кайгырту булган «Экологик иминлек» илкүләм проектын гамәлгә ашыруга зур игътибар бирелә.
«Бүген республикада 37 каты коммуналь калдыклар полигоны файдаланыла, 25948 контейнер мәйданчыгында һәм 53562 контейнерда каты көнкүреш калдыклары туплана. Каты коммуналь калдыкларны 490 берәмлек махсус техника ташый», – диде министрның беренче урынбасары.
Очрашу барышында делегацияне җитәкләгән Приморье крае Хөкүмәте Рәисе урынбасары Владимир Малюшицкий республикада чүп яндыру заводы төзелешенә аерым кызыксыну белдерде.
Энергетиканы утильләштерү заводын төзү этаплары һәм объекттагы агымдагы вәзгыять турында «АГК-2» ҖЧҖ генераль директоры Дмитрий Гулак сөйләде.
«Региональ экологик оператор» ҖЧҖ директоры Радик Сәлахов Татарстан территориясендә калдыкларны эшкәртү буенча комплекслар төзү планнарын тәкъдим итте.
Очрашуда шулай ук каты коммуналь калдыклар белән эш итү буенча «Гринта» ҖЧҖ һәм «ПЖКХ «ИК» ҖЧҖ төбәк операторлары да катнашты. Алар региональ операторлар эшчәнлеге зоналары буенча каты коммуналь калдыклар белән эшне оештыру турында хәбәр иттеләр.
Приморье крае делегациясе Татарстан ягына мәгълүмат һәм файдалы тәҗрибә уртаклашулары өчен рәхмәт белдерде.