2026 елда беренче чираттагы төзекләндерү проектлары өчен 329 052 татарстанлы тавыш бирде
2026 елда төзекләндерү өчен җәмәгать урыннарын һәм ишегалды территорияләрен сайлау буенча бөтенроссия онлайн-тавыш бирүнең алтынчы атнасы тәмамлана.
21 апрельдә башланганнан бирле тавыш бирүдә 329 052 татарстанлы катнашты. Планның 82,25 проценты. Әлки, Арча, Әтнә, Югары Ослан, Биектау, Теләче һәм Тәтеш районнарында яшәүчеләр иң актив дип табылды. Тавыш бирүчеләр саны Казанда, Актаныш, Тукай һәм Бөгелмә районнарында азрак.
Тавыш бирү өчен тәкъдим ителгән җәмәгать урыннары исемлегенә 283 объект һәм 812 ишегалды территориясе кертелгән. Җиңгән объектлар «Тормыш өчен инфраструктура» илкүләм проектының «Уңайлы шәһәр мохитен формалаштыру» федераль программасы һәм «Безнең ишегалды» республика программасы буенча яңартылачак.
ТР Төзелеш, архитектура һәм торак-коммуналь хуҗалык министры урынбасары Владимир Кудряшев билгеләп үткәнчә, 2015 елдан башлап Татарстанда халыкны территорияләрне сайлаганда һәм проектлаганда иҗтимагый фикер алышуларга җәлеп итү уңышлы кулланыла.
2015 елдан 2024 елга кадәр Татарстанда барлыгы 26 млрд сумлык 422 җәмәгать урыны яңартылган. 2025 елда «Яшәү өчен инфраструктура» илкүләм проектын гамәлгә ашыру кысаларында 2 млрд сумга якын 63 объектны төзекләндерү планлаштырылган.
Моннан тыш, 2020 елда Татарстан Президенты Рөстәм Миңнеханов инициативасы белән республикада уникаль «Безнең ишегалды» программасы старт алды. 5 ел эчендә 44 млрд сумлык 5174 йорт яны территориясе төзекләндерелгән. Агымдагы елда программага финанслау лимиты 10 млрд сум булган 678 ишегалды территориясе кертелгән.
2026 елның беренче чираттагы проектларын билгеләү буенча онлайн-тавыш бирү Татарстан Республикасы дәүләт һәм муниципаль хезмәтләр Порталында «Халыктан сораштырулар» сервисы аша һәм «ТР Хезмәтләре» мобиль кушымтасында уздырыла һәм 12 июньгә кадәр дәвам итәчәк.