17 ел эчендә республика программасы буенча 12 меңнән артык күпфатирлы йорт ремонтланган
Күпфатирлы йортларга капиталь ремонт ясау программасы Татарстанда 2008 елдан башлап гамәлгә ашырыла башлады һәм аны гамәлгә ашыру срокларын, халыкка кагылышлы кешеләрнең санын, инвестицияләр күләмен исәпкә алып, иң масштаблы программаларның берсе булып тора. Бу хакта бүген Татарстан Республикасы Төзелеш, архитектура һәм ТКХ министры Марат Айзатуллин Татарстан Республикасы Министрлар Кабинетында республикада КФЙ капиталь ремонтының барышына багышланган брифингта хәбәр итте.
«Татарстанның уңай тәҗрибәсе федераль торак законнарына үзгәрешләр кертү өчен этәргеч булды. Шуңа бәйле рәвештә 2013 ел ахырында Россия Федерациясенең барлык субъектларында күпфатирлы йортларны капиталь ремонтлау буенча региональ система булдырылды, аңа кайбер норматив-хокукый актлар, шул исәптән капремонт турындагы закон, региональ оператор булдыру, кертемнең минималь күләмен билгеләү, капиталь ремонт буенча региональ программаны раслау керә», – диде Марат Айзатуллин.
Республика төбәк программасына 17 мең 635 күпфатирлы йорт кертелгән. Аны гамәлгә ашыру вакыты 30 елга – 2014 елдан 2043 елга кадәр билгеләнгән. Төбәк операторы – «Татарстан Республикасы торак-коммуналь хуҗалыгы фонды» коммерциягә карамаган оешмасы төзелде.
Татарстан Республикасы Төзелеш министрлыгы башлыгы сүзләренә караганда, узган 17 елда 12 меңнән артык күп фатирлы йорт ремонтланган, аларның гомуми мәйданы 53 млн кв. метрдан артык. Әлеге йортларда яшәүчеләр саны 2 миллионнан артып киткән.